Tottenham Hotspur manager Antonio Conte chuan team in hma lam pana kawng dik tak an zawh mek thu a sawichhuak. Conte nau te hian season hmasa khan league table ah palina dinhmun hauh in season an khar a, season thar 2022-23 ah Champions League an khel ang.
Spurs hian 2008 hnulam ah nomawi pakhat mah an la chawi lova, Conte enkawlna hnuai ah chawi thei tak ang maw?
Tun nipui transfer bazar ah Tottenham an che na thawkhat viau a, season hmasa a Everton top scorer Richarlison chu £60 million lai in an lalut. Ani mai bakah Ivan Perisic, Yves Bissouma, Djed Spence leh Clement Lenglet (loan) te an lalut bawk.
Italian manager Conte hnuai ah Spurs hian hma lam an pan zel tih hairual ani lova, season thar lo awm turah pawh top 4 huanga an awm ngei mi tam tak in an ring.
”Ka ngaihdan chuan he club a ka thil tum chu kawng engkim a hmasawn zel hi ani a, thla 7 liam ta a kan thil tum lawk hlen tura hma lam pan zel ani. ‘Nomawi kan chawi em? Premier League emaw Champions League nomawi kan chawi em? Champions League khel leh turin kan inpet kai em?’ tih lam ai mah chuan kawng engkim ah hma kan sawn em tih hi ka ngai pawimawh zawk. Ka tawnhriat tawh te atangin he club hian kawng dik kan zawh mek zel ani” a ti.
Spurs hian tun season a an Premier League match hmasa ber tur naktuk (Saturday) zan dar 7:30 hian an khel dawn a, Southampton an lo mikhual ang.