Tun hnai lawk khan Manchester United legends Cristiano Ronaldo leh Sir Alex Ferguson te chu hmunkhatah thuin Old Trafford lama hun an hman tawh chungchang te sawiin an inkawm a. C Ronaldo’an Manchester United lama hun a hman hmasak zawk khan match 292 a khelh atang goal 118 a khung a, a vawikhatna atan Ballon d’Or hmasa ber a dawng bawk.
Ballon d’Or vawi 5 dawng tawhtu C Ronaldo leh Sir Alex Ferguson hian relationship annei tha a, an hlim lai leh lunngngaih lai pawhin a inkar a tha thei hle a ni.
Hetia an inkawm lai hian Cristiano Ronaldo chuan Sir ALex Ferguson nena hun an hman dun tawhnaah theihnghilh theih loh a nei nual a, tun tumah hian pakhat a sawi chhuak.
“Ferguson nena hun kan hman dunnaah khan hun duhawm deuh deuh a awm nual. Hnehna chan ringawt a ni lova, hun harsa tak karah pawh hun duhawm tak tak a awm. Hun harsa lai ber ka tawh ka hriat reng pakhat a awm a, ani chuan a hre tawh kher lo maithei, ka sawi hi ka inring ngai lo, mahse, history mawi tak a nih avangin ka sawi chhuak dawn a ni.” tiin Cristiano Ronaldo chuan a sawi.
Critiano Ronaldo hian a pa hospital lama a awm chungchang a sawi a, a pa na taka awm chu Ferguson’an a hmuh tir dan chungchang a sawi tel a ni.
“Nikhat chu hospital-ah ka pa hi na takin a awm tih ka hria, ka lungngaiin, ka down hle. Amah chu ka hrilh a, ani chuan, ‘Cristiano, lungngai suh, ni 2 emaw ni 3 vel i pa hmu turin kal ta che’ tiin a sawi.
Kha tih lai khan games harsa tak khelh tur kan nei a, key player ka nihlai a ni bawk nen. Ani chuan, ‘a harsa viau dawn a chhan chu games harsa tak khelh tur kan nei a ni, mahse, i dinhmun hi ka hriatthiampui a che, chawlh ka pe dawn che a, i pa chu i hmu ngei dawn nia’ tiin a sawi.”
“Hei hi ka tan chuan thil pawimawh ber a ni, Champions League nomawi chawi te, Premiere League nomawi chawi te, cups leh thil dang ai pawhin ka tan a pawimawh zawk a ni. Ka hnena a thusawi avang hian ka tan chuan a hlu em em a, englai pawhin ka tan a hlu reng tawh a.” tiin C Ronaldo chuan a sawi.
Source SK