Argentina footballer zinga Lionel Messi aia Cristiano Ronaldo thlangtu chu an vang pharh âwm e, hetih mêk lai hian Argentine Women team star Yamila Rodriguez chuan a hnampuipa Messi aia Portuguese legend Ronaldo chu a idol anih thu huaisen takin a sawichhuak.
Kum 25 a upa hian Ronaldo a ngaihsan zia lantir nan a chawn veilam ah Ronaldo lem tattoo a nei a, a mal ah Argentine legend Diego Maradona lem tattoo a nei bawk.
Argentine mi leh sa ni mahse Yamila hian Portugal captain Cristiano Ronaldo chu a idol anih thu hetiang hian a sawi, “Ka idol chu Cristiano Ronaldo a ni, Messi nilovin. Ronaldo hi rinhleh rual lovin khawvela player tha ber a ni. A inkhel lai ka thlir te hian ka rilru tê tê in: ‘hetiang khawp hian engtin nge a that theih le?’ ka ti fo. A thiltih apiang mai hian ka mak tih a hlawh a, he tattoo nen hi chuan kumkhua in ka hnenah Cristiano a awm tawh ang.”
Yamila hian Messi fans te atangin selna nasa tak tawk mahse a idol thlâk a tum lo hle a, a duh zual sawt zawk. Tun hnai maia an kawmna ah eng vanga Messi thlang lova Messi elpui ber Ronaldo a thlan chhan hetiang hian a sawi.
“Engvangin Messi nilova Cristiano ka thlan chhan maw? He zawhna hi tu mai pawh hian min zawt reng a. A mimal nihna leh player angin ka ngaisang em em a, min chawkphurtu anih bakah nitin mai hian amah leh amah a inkhum thin. Ka idol a ni a, ka ke ah hian khawvela a tha ber pahnih (Ronaldo & Maradona) ka nei a ni” a ti.
SE Palmeiras tana khel mêk Yamila hi tun dinhmunah a ram Argentina aiawhin FIFA Women’s World Cup ah a fehchhuak mêk a, an group stage game hmasa berah substitution bench atanga dah luh ni mahse a team chu Italy lakah 1-0 in a tlawmpui. Argentina Women’s Team hian an game leh ah Sweden an hmachhawn ang.
