‘Ka hmachhawn tawhah chuan striker tha ber ala ni’ tiin Jurgen Klopp’an Sergio Aguero a fak

Sergio Aguero hi Premiere League Striker ropui ber pakhat a ni, Liverpool manager Jurgen Klopp chuan Manchester City striker hlui hi a fak a, a hmachhawn tawha striker tha ber a nih thu a sawi chhuak.

Sergio Aguero’an football a chawlhsan thu a puan hnuah Liverpool manager Jurgen Klopp chuan Sergio Aguero chu fakin a enkawl loh player tha ber a nih thu a sawi chhuak.

Kumin kumtir summer transfer lai khan Sergio Aguero chuan Manchester City atang FC Barcelona a zawm a, mahse, vawiinah football a chawlhsan thu a puang. Aguero’an football a chawlhsan thu a puanna (event) ah hian Barcelona President Joan Laporta leh Barcelona first team player te pawh an tel a, club dang atang Aguero representatives leh Man City boss Pep Guardiola pawh a tel a ni.

FC Barcelona chuan October ni 30 khan Deportivo Alaves an hmachhawn a, match khelh laiin Sergio Aguero awm chu a na a, lak chhuah a ni, Barcelona lam chuan heart Arrhythmia a nih thu an confirm ve nghal.

Test hrang hrang result an lak hnuah, Aguero chu thla 3 chhung tal chawl tura tih a ni a, a hnuah football a khelh chhunzawm zel chuan atan a pawi thei dawn tih chu hrilh that leh a ni.

Manchester City-ah khan kum 10 chhung teh meuh mai hun a hmang hman a, hemi chhung hian goal 260 lai khungin, goal 184 chu Premiere League lama a khung a ni. Premiere League history-ah ramdang player atanga PL goal khung hnem ber record neitu a ni mek.

Aguero hian Liverpool lakah Premiere League goal 7 a khung a, A khung hnuhnun ber tum chu January 2019 daih tawh khan a ni. Kha seasonah khan City chu Liverpool ai point khat chauhvin an sang a, nomawi an chawi a nih kha.

Jurgen Klopp hnenah Aguero chungchang an zawt.

“Naupang hi ka tawrhpui khawp mai, FC Barcelona hi chawlhsan tura pan a ni lova, mahse, a career-ah barcelona a pan ve hi a tha tak zet. Barcelona tan eng thil mah a ti hman lo, a chhan chu a dinhmun zir loh vang a ni a, ka tawrh pui khawp mai.” tiin Jurgen Klopp chuan a sawi.

“Career ropui tak a nei, kum 33 a upa ni tawh mahse, ala tha a, amah pawhin khelh chhunzawm zel a duh, mahse, player thenkhatte chu tun ang kumah hi chuan an retire thin, mahse, ani erawh a dan a dang tlat.”

“Premiere League lamah hian a che tha tak zet a, City lama hun a hman chhung zawng zawng khan tha ka ti, Pep’an Man City a enkawl hma pawhin, goal khungtu ber a ni a, a goal khung te hi a pawimawh thei hle.”

“Heta ka awm hnu pawhin City kan hmachhawn a, kan lakah goal khung thei vak lo mahse, a hnawksak thei hle. Goal pawimawh tak a khung thin tih hi ka hria, mimal takin amah chu ka hre lo, mahse, player ang chuan ka team in an hmachhawn tawh zinga player tha ber pakhat a ni.” tiin Klopp chuan Sergio Aguero a fak.

Source SK

Related Posts

error: Content is protected !!