Kan hriat angin Cristiano Ronaldo chuan Portugal chu 2020 UEFA European Championship tournament atangin a tlak pui a nih kha. Juventus ah C Ronaldo hmalam hun hi a chiang tawh loh hle, Manchester United nen sawi zawm a ni, a hnuaiah hian transfer chungchanga thuthar tlema zawng kan rawn thailang ve leh dawn a ni.
Euro 2020 atanga an tlak hnuin, kum 36 a upa C Ronaldo hian Bianconeri a chhuahsan thut thei niin thuthang tamtak a awm nual.
Hriat angin Fernando Santos enkawl Portugal chuan Round of 16 ah Belgium an hmachhawn a, Belgium lam hian 1-0 in an hneh. Kum 36 a upa Cristiano Ronaldo hian ram tana goal khung hnem ber record nih rual pui tawh mahse, a khum theilo a ni.
Euro 2020 group stage khelh takah khan C Ronaldo chuan goal 5 a khung a, Group F game hnuhnung bera France an hmachhawn tum khan goal hnih khungin ram tana goal khung hnem ber Iran legend Ali Daei record a nih rual pui chiah a ni. Ram tan goal 109 ve ve an khung tling.
Thla khat chhung dawn vel chu Italy lamah a hmalam hun tur chungchang zawhna a tam hle a, Real Madrid player hlui C Ronaldo hian Juventus-ah kum khat daih contract a la nei mek a. A club hlui Red Devils (Man Utd) lamah kir leh tur anga sawi a tam hle bawk.
La Gazzetta dello Sport, tarlan dan chuan Juventus lam hian official takin C Ronaldo offer an la hmu rih lo niin an tarlang a, mahse, a agent Jorge Medes chuan Juventus board chu Ronaldo hmalam hun tur chungchang leh transfer chungchangh meeting nei turin a reguest niin an sawi bawk.
Tun summer transfer window-ah hian C Ronaldo hi £25 million in a lak theih dawn niin an sawi, amah duhtu zingah hian Paris Saint-Germain an langsar hle.
Kan hriat angin kum 2018 khan Roanldo chuan Los Blancos atangin Juventus a zawm a, Juventus player man to ber a ni. Juventus tan match 133 a khelh atangin goal 101 a khung mai bakah assist vawi 22 a nei tling tawh.
Source SL