Juventus chuan an striker Dusan Vlahovic chu Chelsea hnenah Romelu Lukaku bakah sum fai tlemin an hralh phal a, Juventus duh dan hi Chelsea lam pawhin an pawm chuan Vlahovic an tun nipui bazarah Stamford Bridge lam a pan ang.
Chelsea chuan 2021 nipui bazar lai khan £97.5 million in Lukaku hi Inter Milan atangin an sign a, mahse Belgium striker hian West London club tana beisei a phak loh hnuin nikum 2022 nipui bazar lai khan loan in Inter Milan lamah a kir leh a ni.
Hetih mek lai hian 2022/23 season hmang tha lo tak Chelsea chuan an squad tichak zual turin forward thar lakluh an rilruk a, an ngaihven zingah Dusan Vlahovic hi telin official taka la dawr erawh anni lo thung.
Corriere dello Sera tarlan danin Old Lady chuan an striker kawllai Dusan Vlahovic chu Chelsea lamah Romelu Lukaku bakah sum fai £21 million in an hralh phal a, heihi Blues lamin an lo pawm anih chuan Serbian striker hian Premier League lam a pan anga, Serie-A lamah Belgium striker a cham zui bawk ang.
Inter Milan chuan Lukaku hi a ngheta lakluh an duh a, kum 30 a upa man tura an bid theh luh hmasa ber £30 million erawh Chelsea in an hnawl. Belgium striker hian season hmasa khan Inter Milan tan inelna hrang hranga game 37 a inlan atangin goal 14 a khung a, hliam in hun engemaw chen a tlakbuak avangin a duh ang takin a inlan tam thei lo.
Hetih mek lai hian Vlahovic chuan season hmasa khan Juventus tan league game 27 a inlan atangin goal 10 leh assist vawi 2 a thawkchhuak a, Turin ah kum 2026 thleng daih tur contract a la nei. Kum 23 a upa hi Juventus chuan nikum January thla khan Fiorentina atangin £66 million in a nghetin an lalut a ni.