Manchester City striker Julian Alvarez chuan Etihad Stadium a cham chhunzawm zel turin kum 2028 thleng daih tur contract thar a ziak fel.
Erling Haaland a awm miau avangin season kal mek ah Alvarez hian duh ang in team tan a inlan tam lova, a inlan chhunah erawh theihtawp a chhuah thin.
Nikum July thlaa River Plate atanga Man City zawmtu Alvarez hian tun season ah Cityzens tan game 33 inlan tawh in goal 10 leh assist vawi 3 a thawkchhuah tawh a, second striker tan chuan a stats hi a nep lo.
Alvarez hian World Cup neih zawh takah khan Argentina tan goal 4 a khung bakah a champion pui bawk a, Spanish manager Pep Guardiola enkawlna hnuaia hmasawn zel pawh a inbeisei.
”Tun hi kei leh ka chhungte tan hun ropui tak a ni a, City ang club in ka laka rinna an nghat ngam hi ropui ka ti hle” tiin Julian Alvarez chuan City official website a hrilh.
Kum 23 a upa chuan sawi chhunzawmin,”Ka season khatna chauh la ni mahse nuam ka ti hle a, chutihrualin thil tam zawk tih theih ka la inbeisei. Tun aia tha zawk hian ka la khel thei a, ka theihna tak tak phochhuak tur hian City in engkim min pe.”
”Manager, coach leh a langlo ruama hnathawktu te zawng zawng chungah pawh lawmthu kan sawi duh a, he hmun ka rawn pan tir ata tun thlenga ka chunga an thiltih zozai avang hian ka lawm takzet. Hei bak chu han beisei tur dang ka nei chuang lova, he club hian a player te a ngaihven in ka hun hman tawh na zawng zawng ah te an mi thlawpna ka dawng nasa mawlh mawlh hle. Tunah chuan player tha zawk nih a City trophy chawipui hi ka thil tum a ni” a ti.
Alvarez hian tun season ah Premier League game 6 leh UEFA Champions League game 4 ah te inkhelh bul a tan a, a goal khung hnuhnun ber pawh Fenruary thlaah khan niin City in 4-1 Bournemouth an hneh tumin a ni.