Jose Morinho chuan Manchester United star Bruno Fernandes chu a sawisel a, 2020 UEFA European Championship, Portugal match 2 khelhah khan ‘a khel lo’ tiin a sawi.
Euro Champion lai Portugal hi Group F ah awmin, match hnih an khel tawh a, Hungary leh Germany an hmachhawn, Hungary lakah hnehna chang mahse, Germany lakah erawh an tlawm.
Jose Mourinho chuan Portugal harsatna pakhat chu Bruno Fernandes hi a nih a ring a, a khelh ve chhunah pawh duh angin a che tha tawklo niin a sawi.
“Portugal hi level sang berah khel ta se, tupawh an hneh thei a ni.” tiin Tottenham Hotspur manager hlui Jose Mourinho chuan talkSPORT a hrilh.
“Mahse, player 11 a khelh hi kan mamawh, match 2 khelh takah khan Bruno Fernandes chu field chhungah awm ve mahse, a khel lo.”
“France an hmachhawn hunah a khelh leh ngei ka beisei, a chhan chu player theihna ngah tak leh hlauhawm tak a ni.”
“A pass thei a, goal a khung thei a, penalty a hlawh chhuak thei a, penalty a khung thei a, free kick atangin goal a khung thei bawk.”
“Tih theih tamtak nei mahse, Euro game 2 khelh takah khan a awm tlat lo.” tiin Jose Mourinho chuan a sawi.
Portugal hian France an hneh chuan round of 16 an lut thei dawn a ni. Zanin tun atanga rei vak lo vah hian France an hmachhawn dawn a ni.
Source SL