Italian midfielder Jorginho chuan January transfer window liamta a Chelsea atanga Arsenal a zawm chhan a sawichhuak. Kum 30 a upa hian 2018 khan £50 million in Napoli atangin Chelsea a zawm a, Stamford ah kum 4 leh a chanve chhung a khawsak hnuin £12 million in Emirates Stadium lam a pan a ni.
DAZN in an kawmna ah Jorginho chuan Chelsea chhuahsana Arsenal a zawm chhan hetiang hian a sawifiah, “Arteta hi a chhan pakhat chu a ni chiang e. Mi rawn bia a, engkim mai kha rang takin a thleng a, ka deal chungchang kha darkar 48 hmaa zawh fel hman a ni. Chelsea lam pawh ka be ngei a, club ruahmanna ah ka tel tawh lo tih ka hria. Ka career ah hma lam pan zel ka duh a, Arsenal project hi ka mil hle.”
”Team naupang tak la niin football tha tak an chhawpchhuak a, ka zia nen pawh an inmil viau a ni. Thil nihdan tlangpui ka dawn hnuin Chelsea chhuahsan tur khan thutlukna ka siam. A chang hi chuan club thil tum (project) a kan tel tawh loh chuan kan dinhmun pawm thiam a a tawpna siam mai kha a tha zawk” a ti.
A club thar tan Jorginho a pawimawh nghal viau a, Aston Villa laka 4-2 a hnehna an chan tumin Gunners goal thumna a khung. Inkhel dangah Nottingham Forest in an khelmual ah champion lai Man City an lo inhnehtawk pui avangin Mikel Arteta leh a nau te hian khelh khata khel tlem zawk chungin an hnuai chiaha awm City aiin point 2 in an sang zawk.
Gunners hian Emirates Stadium ah 3-1 City an hnehloh hnuin an lakah mi tam tak beiseina a hniam nghal duai duai a, Jorginho erawh in team player te’n an chakloh chu beihdawn nana an hman loh thu a sawichhuak.
Jorginho chuan,”Game kha i thlir a nih chuan penalty box a kan chet dan khan team pahnihte danglamna a thlen. Champion team hmaah khatiang ang tihsual kha penalty box bulah kan nei tur a nilo. Kan tihsual kha hrem nan tak min hmang a, game khelh zawh ah erawh kan khel tha tih kan hria a, inrintawkna pawh kan nei zual sauh.”
”Man City lam kha long ball inpe turin kan force nasa a, team tam tak tihtheih a nilo, chumi avang chuan game tha tak kan khel tih kan hria. An lakah hnehna chang lo in tihsual pawh nei mah ila kan chiai mai lova, a chhan chu he team hian thil tha tak a la hlenchhuah theih vang a ni. Tun hunah hian mahni inrintawkna kan neih a tul a, tuna kan neih lovin engtik ah nge ni ang?” a ti.