Chanchinthar Lawrkhawm Huapzau Celebrity

Joe Biden leh Kamala Harris chak lawmin Donald Trump duh lotu celebrity-te social media lamah an party

Joe Biden leh Kamala Harris chak lawmin Donald Trump duh lotu celebrity-te social media lamah an party

Khawvel ram ropui ber US President thlan result chu a chiang thawkhat tawh a, Joe Biden chuan White House luahin khawvel ram ropui ber a kaihruai dawn a, a thachhang dawltu tur, US hmeichhe Vice President hmasa ber tur Kamala Harris a ni dawn bawk. Anni pahnihin hnehna an chang tih hriat a nih rual khan social media lamah celebrity ho an inlar nasa a, Biden leh Harris an lawmpui thu uar takin an ziak.

Khawthlang milar tam ber leh huhang ngah ber berte khu langsar taka President chhuak tur Donald Trump dodaltute an ni a, a tlin lohna tur pawhin hma an la nasa hlawm hle a,  social media lama follow-tute chuan Biden leh Harris tana an campaign nasat zia pawh an hmuin a rinawm a, hnehna an chan takah chuan social media lamah Democrats candidate-te lawmpuina thu a luanin a luang a ni ber. Ṭhenkhat phei chu khawlaiah chhuakin an lam hial!

Kamala Harris hi mihang a nih avang leh hmeichhia a nih avang hian duhtu an tam zual niin a lang a, celebrity hmeichhe lamah a tla na zual hle. An tweet velah pawh Biden mai bakah Harris hi an mention tel nasa hle a ni. Trump tihel zuina hmuh tur a tam hle bawk a, kum li chhung tehmeuh an lo dodal tawh US President chu an thlah liam ta a, tunah chuan an duh tak an thlang tling ta.

Biden Harris lawmpuina a luang dul dul

Ariana Grande chuan Twitter-ah a ṭap hial tih tarlangin President leh VP thar turte a mention a, ‘THANK GOD’ tih a tarlang tel bawk. P!nk pawhin a mittui a luang hial tih sawiin hmeichhe naupang hmuntina mite chawk phurtu Kamala vang pawhin a lawm hle tih a sawi.

Billboard music award a laknaah pawh uar taka mipui vote thlak tur sawmtu Lady Gaga pawhin Biden leh Kamala-te chu twitter-ah metion-in a lawm hle tih a tarlang a, Christina Aguilera chuan Kamala Harris naupang ho nena an lam lai video a tweet ve thung.

Mariah Carey chuan ‘Joy to the world’ a ti hial a, Rihanna pawhin an ram hruaitu thar turte thlalak tarlangin a lawmpui thu leh America a chhuan thu a tarlang a ni. Tunhnaia thawm nei ngah lem lo tak Mandy Moore pawhin a lawm zia a sawi chhuak bawk. Heng ho bakah hian midang tam takin an lawmpuina thu an tarlang nasa hle a ni.

Miley ‘Party in the USA’

Biden a chak tih hriat a nih ruala social media-a video viral nasa ber pawl chu  Joe Biden-a’n thusawina video tawi, Miley Cyrus hla ‘Party in the USA’ play a nih chhunzawmna, a hnua Kamala Harris lam lai leh Donald Trump-a podium aṭanga escort chhuah a nihna a ni.

Miley ngeiin he video hi tweet a, caption-ah ‘Now THIS is a PARTY IN THE USA!’ tih hmangin Biden leh Harris a mention.

Rockstar lam

Rockstar lamah pawh Joe Biden leh Kamala Harris lawmpuitu an tam viau mai. Skid Row vocalist Sebastian Bach chuan kum 4 liam ta chhung khan hming tel loin President ti ringawta a sawi ṭhin thu leh tunah chuan President Biden tiin mawi takin a lam thei dawn ta tih a sawi.

Hinder-te pawhin an official account-ah an lawnna an tarlang a, Evanescence vocalist Amy Lee pawhin an hla thar behchhan takin mipui aw chu hup beh theih a ni lo tih a sawi lang ve bawk. Pearl Jam pawhin Hinder ang bawkin an account kaltlangin Biden leh Harris an lawmpuina thu an tarlang a ni.

Source Vanglaini