Tun hnai mai khan Joao Felix an West Ham United jersey haa training a neihlai hmuh a ni a, he video hian West Ham fans te mak ti a hlawh a, an sawi zui nasa viau bawk.
Kum 23 a upa hian January thla khan loan in thlaruk chhung atan Chelsea a zawm a, amaherawhchu Blues tan hian beisei phak lovin Premier League game 16 a inlan atangin goal 4 chauh a khung.
Portuguese international hi Blues chuan kawl chhunzawm zel an tum lova, Atletico Madrid lam lah in an forward hi hralhchhuah an pawi ti lo nia report a ni. Chutihrualin Felix man hi a tlawm dawn lova, €123 million a Benfica atanga Atletico Madrid zawmtu hian Spanish club a chhuahsan dawn chuan a tlawm hauh lovang.
Felix hi tun hnai mai khan mahnia training a neihlai hmuh a ni a, beisei loh taka West Ham United jersey ha in a kawr hnungah Algerian forward Said Benrahma leh number 22 a la chuang zui.
He thil hian West Ham United fans te mak tih a hlawh angreng viau a, kawr hak mai tur a neih tam dawn teh vaih nen, eng vanga West Ham kawr kher ha nge anih tih chu social media lama fans te sep rawtui ber a ni mêk.
Fan pakhat chuan, ”Ka ngaihdan chuan Benrahma leh Lucas Paqueta te ho nen tha taka an khelh ho theih ka ring.” Fan dang leh chuan, “Lo phur hluai suh u thiante u, Felix hian West Ham chu a zawm ngai lovang.” Fan pathumna chuan, “West Ham kawr chu a inhmeh hle mai, mahse min rawn zawm erawh ka ring hauh lo. Rice mana kan sum hmuh chu player dang lakluh nan kan hmang zawk ang.”
West Ham in an captain Declan Rice chu Arsenal hnenah an hralh fel tep a, kum 24 a upa manah hian add ons nen phei chuan Hammers hian €123 million a tam an hailut dawn. David Moyes an Rice thlaktu tur player thar a sign ngei a ngai dawn a, tun dinhmunah Manchester United midfielder Scott McTominay chu Rice thkaktu tura rinkai deuh ber a ni bawk.