Gabriel Jesus lo kir leh chu team form tak Arsenal tana buaina a nih theih thu Paul Merson chuan a sawi. Gunners hian season kal mek ah league game 27 atanga point 66 hlawhchhuak tawhin table ah 1-na anni mek a, an striker Jesus awm loh chu an tuar em em pawhin a lang lo.
Brazilian forward hi World Cup lai khan khup hliam a nei a, a hliam te zai anih hnuin a dam fel tawh a, Gunners in an league game hnuhnung bera 3-0 a Fulham an hneh tumin substitution bench atanga dah luh a ni.
Jesus tel lo hian Arsenal chuan league game 12 zet an khel hman a, amaherawhchu an striker rinrawl a awm lo tih hriat loh khawpa che tha in table chung ber an luah chhunzawm zel a, pahnihnaa awm Manchester City nen point 5 in an inthlau mek.
Jesus a lo kir leh tawh a, starting XI chan nghal pawh a duh ngei in a rinawm. Hetiang anih chuan team siksawi kawngah Arsenal manager Arteta lu a hai ve viau maithei.
”Gabriel Jesus lo kir leh hi Arsenal tan chuan buaina a ni maithei a, a chhan pawh Jesus hian inkhelh tam a duh vang a ni. Man City anga squad a tel ve satliah ringawt kha Arsenal ah hi chuan a duh dawn lo. Tun dinhmunah hian team tan buaina a thlen thei a, kawng lehlam zawng tak erawh chuan signing thar ang a ni” tiin England leh Arsenal winger hlui Merson chuan a sawichhuak.
kum 25 a upa hian Gunners tan season kal mek ah league game 15 a inlan atangin goal 5 leh assist vawi 5 a thawkchhuak tawh a, team chakna hnar ber pakhat a ni.
Paul Merson chuan January thlaa Arsenal lakluh Leandro Trossard chungchang sawi leh in, “Leandro Trossard hi Man City tan pawha khel thei tur a ni. Pound 27 man player ah chuan awihawmloh khawp in a tha. Thawhlehni zanlaiah Man City tan inlan pawh nise player dangte nena a danglamna vak in hmu lova, chutiang khawpa tha a ni” a ti.
