Gabriel Jesus chuan rilru na tak leh a mittui meuh kochhuaktu Pep Guardiola vanga Manchester City chhuahsan anih thu a sawi.
Jesus hian November 2021 vel daih tawh khan Man City chhuahsan turin thutlûkna a lo siam fel diam tawh a, he thutlûkna a siam chhan hi match a khelh ngei ngei na tur nia a ngaiha a luh loh vang leh a aiah left back Zinchenko a chhawr vang a ni.
Pep Guardiola game plan ah a tel tawh lo tih a inhriat hnuin Jesus hi a lunghnur hle a, he thil hian a mittui hial kochhuakin anu hnenah phone call hmanga City a chhuahsan tur thu a hrilh nghe nghe.
Denilson show kaltlangin Jesus hian Man City chhuahsan tura thutlûkna a siam dan hetiang hian a sawi, “Champions League game niin kan khelmual ah PSG kan hmachhawn a, Zinchenko chu false 9 ah a hmang. Thil mak tak a ni! PSG kan tum hma chiah ni a training kan neih na ah striker ang in min khelhtir a, Zinchenko chu a chhawr lo hrim hrim thung. PSG nena kan game a zawh meuh chuan Zinchenko an ‘ka tawrhpui khawp mai che’ min ti fiamthu hial a. Game tan hma in darkar hnih hun kan nei a, team talk te, thil ei bakah minute 30 kan chawl a, chumi hnuah game kan khel. A lut tur ho ka hriat avangin eng thil mah ka ei lova, room ah kal nghal in ka nu ka bia a, ‘ka chhuak duh, ka lo hawng duh. Kei min dah lut lovin Zinchenko a luhtir a, kei aiah left back a chhawr maw!’ tiin ka thin a rim em em a” a ti.
PSG ah hmachhawn tum hian Jesus an Zinchenko a thlak a, 1-0 a hnufual mêk City chu 2-1 a hnehna chanpuiin Brazil forward hian goal leh assist a nei nghe nghe bawk.
Arsenal striker chuan sawi chhunzawmin, “Ka lungnih loh êm avangin insawizawi (warm up) pawh ka peih lova, Mbappe an goal a khung hnu minute 5 velah Guardiola an min dah lut a, goal leh assist neiin City ka chakpui. Karthara Champions League match ah RB Leipzig kan hmachhawn a, ka luh ngei ka rin laiin ka lut leh miah lo bawk! Guardiola hrawn hi a harsa em em a, City a cham zel ka duh tawh loh avangin chhuak turin thutlûkna ka siam ta a ni” a ti.
Jesus hian January 2017 khan Palmeiras atangin Manchester City a zawm a, Etihad Stadium a season 5 leh a chanve a cham chhungin trophy 11 zet a chawi hman a ni.