Contract thar a ziah duh loh avanga Paris Saint Germain in hralhchhuah an tum mêk Kylian Mbappe chu International Player’s Union in an chhan a, club-a a contract neihlai hmang zo tura dikna chanvo a neih thu an hrilh.
Kan hriat ang in France forward hian PSG ah contract thar ziah a tum lova, nakkumah a thlawna Real Madrid zawm chu a duh dan a ni. Amaherawhchu PSG lam erawhin an forward hi a thlawna chân an tum lo hulhual a, 2017 a £154 million a an lâkluh hi kuminah to taka hralhchhuah ve an duh.
Mbappe chungchangah PSG in thutlûkna an siam fel tawh a, an forward contract thar ziak duh lo hi kumina hralhchhuah ngei an duh avangin pre season tour nei mêk team squad ah pawh an telh lo.
Contract thar a ziah duh loh vanga an thlauthlak mêk Mbappe hi International Player’s Union, FIfpro chuan a chhan a, an thlawp tlat.
Fifpro General Secretary Jonas Baer-Hoffmann chuan Mbappe dikna chanvo hetiang hian a sawi, “A contract neilai hi zah a, season la bak zawng hmang tluan turin dikna chanvo engkim a nei. Chumi hnuah tu tan nge a thawh leh duh tih ah thutlûkna a siam thei ang.”
”Hei hi Bosman ruling (player te’n free agent a club an chhuahsan theihna dan) ngei chu a ni a, player te zalenna a ni bawk. Player tam tak te chu contract an neihlai renga club chhuahsan tuma club hotute an nawr chiam thin avangin club hotute bakah fans te atangin sawiselna nasa tak an tawk a, tunah erawh top player (Mbappe) in a contract neihlai a zah avangin club a la cham duh mahse chhuak tura nawr chiam a ni.”
”PSG leh Mbappe te’n kumhnih chhung atana inremna an nei a, a tu lam ve ve pawh hian contract thar ziah anih lai khan tun hun hi thleng thei a ni tih an hria ang. Kylian Mbappe hian a contract hmang zo tura a inpumpêk thu a sawi a, chumi tur atan chuan theihtawp a chhuah bawk” a ti.
Kum 24 a upa France captain hi PSG pre season squad ah a tel lova, kuminah Parc des Princes a chhuahsan ngeiin a rinwm. Saudi lamin sum tam tak an offer mêk lain Premier League club lian te pawhin an ngaihven mêk a, Mbappe kal duhna ber Real Madrid lam pawh an rawn che thuai in a rinawm.