Inter nena sawizawm mêk Lukaku an Chelsea pre season training zawm tum lo

Romelu Lukaku chuan kumin nipui bazarah a ngheta Inter Milan zawm ngei a duh avangin naktuk a Chelsea in pre season training an neih hunah Belgium striker hian team training zawm ve a tum lo.

Blues chuan an player te chu naktuk July ni 12 khian pre season training nei tura lo kir turin an hrilh a, Belgium striker Lukaku pawh tun dinhmunah Chelsea player a la nih miau avangin pre season training a zawm ngei an beisei dawn.

Chelsea boss Mauricio Pochettino chuan, “Pre season training tura lo kir te chuan ka office a rawn kal in chibai min rawn hlan tur a ni a, Lukaku pawh Chelsea player a la nih ang in chutiang thil chu a lak atangin ka beisei” a ti.

Chelsea head coach Pochettino an Lukaku chu pre season training nei tura a lo kir ngei a beisei laiin Lukaku erawh in Inter Milan zawm ngei a duh avangin Chelsea pre season training zawm ve a tum lo tih Telegraph chuan a tarlang.

Kum 30 a upa Belgium striker chungchangah Chelsea leh Inter Milan te an indawr mek a, Inter lamin £30 million bid ah theh luh chu Chelsea lamin an lo hnawl tawh a, West London club hian an striker 2021 a £97.5 million a an lakluh manah hian a tlem berah £40 million tal hmuh let an duh.

Lukaku hian 2021 khan beiseina sang tak nen Chelsea lamah kir leh mahse Thomas Tuchel game plan ah a insiamrem thei lova, thlauhthlak a ni nghe nghe. Blues tana league goal 8 chiah a khung hnuin Inter Milan ah loan in a kir leh a, hliam in tlakbuak nasa mahse Serie-A club tan hian season hmasa khan inelna hrang hranga game 37 a inlan atangin goal 14 a khung.