Major League Soccer lam pan tura Lionel Messi hmin anih dan Inter Miami managing owner Jorge Mas chuan a sawi a, England legend David Bechkham pawh a inrawlhthuk hle nghe nghe.
Argentina captain Lionel Messi an Paris Saint Germain-a a contract neihlai a hman zawh hnuin MLS lam pan turin thutlukna a siam a, a club hlui Barcelona-a a kir theih loh bakah Saudi lam offer mawm zet mai a hnawl bawk. Lionel Messi hian season khatah €45 million – €55 million a hlawh dawn a, Inter Miami ah season hnih leh a chanve chhung daih tur contract a ziak ang.
El Pais in an kawmna ah Inter Miami hotu lu Mas chuan MLS lam pan tura Lionel Messi an hmin dan hetiang hian a sawi, “Kum 3 chhung teh meuh Messi lakluh tumin tan kan la a, kumkhat leh a chanve chhung phei chu kan bei ngawrh hle. Kumin May thla a lo inherchhuah meuh chuan kan thil tum kan hlen ve ta reng mai. Beckham hi inkhel thiam anih avangin inkhel chungchang ngawr ngawr ah Lionel Messi a titi pui thin a, keini pawh in pressure pek tam kan duh lem lo. Messi hi Barcelona, Miami, Rosario leh Doha ah te inbiakna kan neihpui tawh a, World Cup chhung zawng khan Qatar ah awm in Argentina inkhel ka hmaih ngai lo bawk. Tin, Apple nena an contract hi Messi an Miami lam a pan chhan lian tak a ni.”
Mas chuan Ballon d’Or 7 kawltu Messi an Major League Soccer chu khawvela league sawi hlawh ber te zingah a chhuah theih a rin thu sawi leh in, “2019 atang khan Messi lakluh tumna hi kan lo nei tawh a ni. Messi hian MLS hi khawvela league sawi hlawh ber 3-na emaw 2-na ah a chhuah theih kan beisei a, chutiang chhinchhiahna chu he league tana hnutchhiah ngei pawh a duh ang. Football piahlam thlengin he ram tan hian hamthatna a thlen thei dawn a, inkhelh a chawlhsan hunah he club atang hian chanvo a nei bawk ang.”
Messi hian Miami ah kum 2 leh a chanve chhung daih tur contract a ziak dawn a, chumi awmzia chu kum 2025 December thleng MLS ah contract a nei dawn tihna a ni.
Inter Miami in Messi an sign theih chhan turah Apple company a inrawlhthuk hle a, kumin kumtir lam khan MLS leh Apple te hi kum 10 chhung thawkdun tura inremna neiin an contract pawh 2.3 billion dawn a ni hem mai!
2006 atanga Messi sponsor ngar ngar tu Adidas hi MLS kit siamchhuak tu te niin Messi an MLS club a zawm dawn tak si ah chuan Adidas company hlawkna pawh a pung thur thur ngei ang le.
Messi hian July ni 5 ah a teammate thar te a zawm dawn a, Miami lam hian Messi bakah Barcelona legend dang Sergio Busquets leh Jordi Alba te pawh sign an tum dawn nia report a ni bawk.
