Lionel Messi an Barcelona fans te tha taka a mangtha theihnan Inter Miami chuan Camp Nou ah Barcelona nena friendly match neih an rilrûk a, chumi tur atan chuan club hotute’n hma an la mêk.
Argentine captain hi 2004-2021 inkar khan Barcelona kawr ha in game 778 teh meuh a khel a, goal 672 khung bawk in club pakhat tana goal khung hnem ber a ni.
Kum 36 a upa hian Barcelona tan title thahnem tak a chawi a, chung zingah chuan league title 10 leh UEFA Champions League 4 te a tel bawk. Tin, Barcelona-a a cham chhung hian Ballon d’Or 6 zet a dawng nghe nghe.
2021 khan Messi hian beisei loh takin Barcelona a chhuahsan deuh thut a, a chhan pawh club sum dinhmun that tawk loh vang a ni ber. Barcelona legend hian fans te thlahna hun pangngai tak pawhin a nei thei lova, club tana a thil tih zozai te ngaituahin kha aia inthlahna ropui zawk kha a phû chiang e.
Inter Miami neitu Jorge Mas chuan Lionel Messi an Camp Nou ah ngei Barcelona fans te tha taka a mangtha theihnan Barcelona nena friendly match neih a rilrûk thu a sawi.
Jorge Mas chuan, “Lionel Messi an Camp Nou ah fans te hmaa inthlahna thu pangngai taka a sawi theih ka beisei. Barca ah sawn pangngai taka thlah hi a phû. He thil thlentir tur hian ka tih theih zawng zawng ka ti dawn a, a chhan pawh he thil hi a phû êm vang a ni” a ti.
Tunah hian Barcelona stadium Camp Nou hi chei that mêk niin friendly match khel tur chuan an la nghah hret a ngai dawn a, Barca lam pawhin an stadium hi peih fel anih hma chu Olympic Stadium ah home game an la khelh rih a ngai.