Leagues Cup match group stage Round 2 chu tukin zinglam khan khelh niin Inter Miami chuan an khelmual DRV PNK Stadium ah Atlanta United an lo mikhual a, mual neitu lam hian 4-0 zetin hnehna an chang.
Tukin match kha Miami tana Ballon d’Or 7 kawltu Messi inkhelh bul tan hmasak ber tum a ni nghe nghe a, chutiang tho in Sergio Busquets pawh.
Miami tan a game hmasa bera free kick mawi zet a chhuihluh hnuin a game hnihna ah Messi an goal hnih leh assist vawi 1 a thawkchhuak leh a, a team chu Atlanta United lakah chiang takin hnehna a chanpui. Goal hnih dang te hi Finland striker Robert Taylor khung te a ni ve bawk.
Eastern Conference table a 7-na Atlanta United hi DRV PNK Stadium ah table mawngphah luahtu Miami lakah an mualpho hle a, Miami captian thar Messi chuan goal hmasa pahnih; minute 8-na leh 22-na ah te khungin a team tan a thawhhlawk hle.
Diddy, DJ Khaled, Camila Cabello leh David Beckham te chu entu mipui zinga milar thenkhat te anni a, fans thahnem tak hmaah Argentine captain leh a thiante’n inkhel hmuhnawm an chhawpchhuak.
Tihian Inter Miami chuan Leagues Cup group stage game hmasa pahnih atanga point 6 lai an hmuh tawh avangin group stage an paltlang a, Round of 32 an inhlangkai fel.
Eastern Conference table mawngphah a awm Inter Miami game leh tur hi league game (MLS) niin, an khelmual DRV PNK Stadium ah table a 12-na Charlotte an hmachhawn ang.