Inter laka hnehna chan kha kan phu – Julian Naglesmann

Nizan khan German champion Bayern Munich chuan Champions League group stage game hmasa berah Inter Milan an tlawh a, Sane leh D’Ambrosio (OG) te goal hmanga hnehna changin, point thum an hlawhchhuak.

Bayern Munich hian 2003-2004 season atang khan Champions League game hmasa berah hnehna an la chang ziah a, season 19 chhung chu Champions League bul an tan tha tihna anih chu. Tin, 2020 a Champions League chawitu hian Italian team lakah tun hnai match 11 chhungin chakloh tum an la neilo bawk.

”Vawiin a kan khelhdan ah ka lawm em em a, minute 90 chhung khan tha tho takin kan khel. Minute 10 vel chhung kha chu kan tumpuite’n na tak tak in min nawr a, mahse a game pumpuia thlir chuan kan che tha a, Inter laka hnehna chan kha kan phu. Point thum nena bul tanna pawimawh tak a ni” tiin Bayern Munich head coach Julian Naglesmann an Inter Milan laka point 3 hmuh an phu thu a chhakchhuak.

”Hnehna kan chang anih chuan ka lawm hle thin a, amaherawhchu kawng tam takah hmasawnna tur kan la nei. Nitin hian tha thlah lova hma lam kan pan zel a tul” tiin a sawi chhunzawm bawk.

Hetih mek lai hian Bayern Munich nena group khata awm Barcelona lam pawh in an tumpui Viktoria Plzen chu 5-1 ngawt in an lo tukdawl a, Bayern striker hlui Lewandowski an Barca tan hattrick a siam nghe nghe. Team pahnih Barcelona leh Bayern Munich te hi karleh September ni 14, thawhlehni zanlai dar 12:30 ah Allianz Arena ah an innuai ang.

error: Content is protected !!