Transfer bazar hnuhnung bera Manchester United nena sawizawm Barcelona forward Memphis Depay chuan a tam thei ang bera inkhelh a duh thu a sawi.

Tun nipui bazar liamta khan Cristiano Ronaldo an Old Trafford chhuahsan a tum avangin Man Utd lam chuan a thlaktu turin an forward hlui Depay hi an ngaihven anih kha.

Depay hian 2015 khan PSV Eindhoven atangin Manchester United hi a zawm a Red Devils tan game 53 a inlan atangin goal 7 chauh a khung. Man Utd a beisei a phakloh hnuin Lyon a zawm a, Ligue 1 club tan erawh a che tha. Nikum nipui bazar khan kum 28 a upa hian free transfer in Barcelona a zawm a, season hmasa lamah Barca innghahna ber pakhat ni mahse tun season ah erawh forward nei tha Barca tan hmun a chang tam thei tawh meuh lo.

”Kar hnih liamta chhung khan Barcelona tan inkhelh bul vawi hnih chiah ka tan a, chu chu a tawk lo hle. Minute 60 hnua lakchhuah ka ni a, mahse inkhel mualah chu aia hun tam zawk hman ka duh. A tawp lam minute 25 vel ah hian hmun awl a tam thin a, chu hun chu hman tangkai ka duh” tiin kum 28 a upa Depay an inkhelh tam a duh thu a sawichhuak.

Dutch international chuan sawi chhunzawmin,”Inelna hi ka ngaina a, ka tlansan ve ngailo. Barcelona a awm hi nuam ka tih em em rualin club dang atanga sawmna ka dawn pawh hi ngaituah chian a tul ang. Tunah erawh Barcelona ah ka awm a, hmun nghet chang turin theihtawp ka chhuah ang” a ti.

Related Posts

error: Content is protected !!