”India ah Messi a inkhelh theihnana lo zinpui ka duh” – Emi Martinez

Tun hnaia maia India rama rawn zin Argentina goalkeeper Emiliano Martinez chuan ram lama an captain Lionel Messi ropui zia mai chu India football fans te a fah leh mawlh mawlh a, Copa America leh World Cup lehpek te pawh chawi ngei an tum thu a la sawi zui.

2022 World Cup winner hi Kolkata khawpuiah mipui thahnem takin an lo hmuak a, an lo dawnsawn dan ropui tak avangin leh mipui tam lutuk mai chu mak pawh a ti viau nghe nghe.

Kolkata a Stadium hlun leh ropui Mohun Bagan khelmual a pan lai te chuan ”Messi, Messi” tih au thawm ri a nasa em em a, Martinez pawh hian Ballon d’Or 7 kawltu Messi hi India mipuite hma ah a fak hreh hauh lo.

Indian mipui tam tak hmaa Lionel Messi chungchanga reporter te zawhna Aston Villa goalkeeper chuan chhangin, “Lionel Messi hi footballer piang tawh zawnga a tha ber a ni. Lionel Messi ang hi hma hunah a awm leh tawh dawn lo. Ani tluk tum chu thil harsa tak a ni ang. Tuna ka lo zin hi a tawk mai lova, he hmun India ah ngei mai Lionel Messi hi inkhel tura lo zin pui ka duh a ni” a ti.

Martinez chuan sawi chhunzawmin, “Goal a ka khelh hian a tha ber nih theih ka inbeisei. Copa America kan chawi a, Italy lakah Finalissma, chumi hnuah World Cup. Tunah chuan engkim mai kan chawi tawh. Copa America lehpek pawh kan chawi dawn a, World Cup leh pawh kan la chawi ngei ka beisei.”

Martinez hian ram tana a trophy chawi theih tur zawng zawng chawi kim tawh mahse international football la chawlhsan mai a tum lova, trophy chawi belh chaka tuihal a ni.

”Kum naupang te kan nih lai atangin Argentine number 1 goalkeeper nih hi ka tum ruh hle. Tunah hian ka chawl hahdam mai mai dawn lova, tun aia tha zawk leh trophy tam zawk chawi a, Argentina tana tournament tam tak la khelh ka duh” tiin Martinez chuan a sawi.

Martinez hian chawlh a hmang mek a, July thla laihawl vel ah pre season tan turin Aston Villa-a a kir leh ang. Hetih mek lai hian Lionel Messi erawh Major League Soccer lamah a insuan dawn a, July ni 21 hian a team thar Inter Miami tana a game hmasa ber a khelh a rinawm bawk.