Tottenham Hotspur in sikhat faia Manchester City an hneh zanah Harry Kane chuan record thar a siam a, a tana hun danglam bîk a nih thu inkhelh banah a sawichhuak.
Nizan Premier League inkhelah mual neitu Spurs chuan Harry Kane goal khat hmangin champion lai City an tukdawl a, point 3 hlu em em mai an sualchhuak. Spurs hian point 39 hmu tawhin league table ah 5-na anni mêk a, City hian point 45 hmu in table ah 2-na anni thung.
Kane chuan Spurs tan goal 267 a khung tling ta chiah a, hun rei tak chhung Jimmy Greaves an Spurs top goalscorer record a lo chelh tawh chu England captain hian a thaichhe ta chiah a ni.
Tin, Kane hian zanin khan Premier League goal 200 a khung tling chiah bawk a, Alan Shearer an PL goal 200 khung tling tura game a mamawh zat (306) aiin game hnih in a khel tlem. Manchester United legend Wayne Rooney pawhin PL goal 200 khung tling turin game 462 lai a hmang bawk.
Kane chuan inkhelh banah hetiang hian a record siam chungchang Sky Sports a hrilh,”Ka tan chuan hun danglam bîk a ni a, hnehna chan a he thil hlen bawk hi ka châk takzet. Goal 1 a hma kan hruai khan ka rilru ah clean sheet tih hlir a lo lang.”
“Fans te hmaa khatiang thil tih kha a mak dangdai hle a, he thil chungchang hi sawi a tam em em a, keipawhin hlenchhuah vat hi ka tum rêng a ni. Game lian tak leh khawvela team tha ber pakhat laka he record siam hi a ropui dangdai takzet.”
“Greaves kha hero a ni chiang a, football khel tawh zînga striker tha ber pakhat a ni. Ani nena sawi dun kan nih avang leh a record ka khum thei mai avang hian ka tan chuan hun ropui tak a ni.”
Kum 29 mi Kane hian tun season ah league goal 17 a khung tawh a, a nep lo hle. Amaherawhchu City striker Haaland an league goal 25 lai a khung tawh a, Kane hian sawi a hlawh tawk lo.