Manchester United leh Atalanta te chu Danish striker Rasmus Hojlund chungchangah an inrem fel thei ta chiah a, Premier League club hian Danish striker manah €70 million + adds ons an insêng ang.
Transfer window inhawn atanga kar reilote hnuah Red Devils leh Hojlund te sawizawm anni nghal zat a, hun rei tak club pahnihte an indawr hnuin inremna an nei fel thei ta.
Hojlund hian ni tam liamta khan mimal thilah Manchester United chu inremna a lo neihpui thân tawh a, tunah chuan a duh leh beisei ang ngei in Old Trafford lam a pan thei dawn.
Kum 20 a upa striker hian Man Utd ah June 2028 thleng daih tur contract a ziak dawn a, a contract hi thla 12 dang pawhsei theih tur a ni bawk.
Tun atanga darkar 48 chhungin club pahnihte’n Hojlund transfer chungchanga lehkha pawimawh te an sign fel hman dawn a, chumi hnuah medical test leh contract ziahna hun neih chhunzawm a ni bawk ang.
Danish striker hian season hmasa khan Atalanta tan inelna hrang hranga game 34 (20 starts) a inlan atangin goal 10 leh assist vawi 2 a thawkchhuak a, Euro 2024 qualifier ah Denmark tan game 4 a inlan atanga goal 6 khung tawh in he inelna-a goal khung tam ber a ni.
Club dangte ang in Man Utd pawhin kuminah an squad thawmthat hna an thawk chho mawlh mawlh a, Mason Mount leh Andre Onana te an lâk fel hnuin an awh tak striker thar Rasmus Hojlund an lalut leh ngei dawn e.