Manchester United lakluh tum Rasmus Hojlund chuan a professional career a defender hmachhawn harsa a tih ber a sawichhuak.
Atalanta forward hian Manchester United defender hlui Chris Smalling chu defender a lo hmachhawn tawh zawng zawnga tawhkhirh ber anih thu a sawi a, English defender tuan ranna leh a taksa chakna chu a dah chungnung hle.
Tutto Sport in an kawmna ah Hojlund chuan, “Roma defender Chris Smalling khan harsatna mi thlen hnem ber. A fing in a tuan a rang em em a, taksa chakna nasa tak a nei bawk. Ka chakna hmangin duels (mi pahnih inbeihna) ah hneh ka tum thin a, mahse a chaklo zawk ah ka tang leh nge nge zel. Ka hneh theihnana kawng dik ber tun thleng hian ka la zawng mek a ni” a ti.
Kum 20 a upa hian nikum nipui bazar lai khan Atalanta a zawm a, Serie-A club tan hian a season hmasa berah inelna hrang hranga game 42 a inlan atangin goal 16 a khung. Tin, Euro 2024 qualifier ah a ram Denmark tan game 4 a inlan atangin goal 6 a khung tawh a, he inelna a goal khung tam ber ni lai mek a ni bawk.
Man Utd in Harry Kane leh Victor Osimhen te an beisei ngam loh hnuin Rasmus Hojlund lam an hawi a, Danish striker sign tum hian tan an la mek. Atalanta chuan an striker beiseiawm tak hi holam taka chan an tum bik hauh lova, an hralhchhuak dawn anih chuan a manah £50 million an phut.