Jordan Henderson chuan tun atanga darkar 48 chhung hian a hma hun zel tur a tifel dawn a, Liverpool legend Steven Gerrard club thar Al-Ettifaq a zawm ve mai ang em tih chu kan hre thuai ang.
Mail Sport chuan kar liamta khan Al-Ettifaq in Liverpool captain hi an lo ngaihven tawh thu a tarlang a, amaherawhchu Henderson hian Anfield chhuahsana Middle East lam pan mai a la tum lo.
Kum 33 a upa English midfielder hian Euro 2024 a The Three Lions tana inlan theih a duh a, a chhungte pawhin Saudi lama insuan chu an hreh deuh nia sawi a ni bawk.
Amaherawhchu Gerrard ang in Henderson pawh hian a lo hnar tawh Saudi lam sawmna chu a ngaituah tha leh a, Gerrard ang deuh in a rilru thlaka Saudi lam a pan pawhin thil awm lo zawng a ni hauh lovang.
Henderson hian Liverpool ah kartin £1,90,000 a hlawh nia report a ni a, Al Ettifaq chuan karkhatah £2,85,000 hlawh pêk an inhuam. Tin, kum hnih daih tur contract ziahpui a, kum khat dang la pawhsei theih tura duan an tum bawk.
Henderson pawhin a hma hun turah thutlukna a siam fel thuai dawn a, Saudi lam a pan dawn nge Liverpool ah a la cham ang tih chu kan hre thuai ang. Reds hian an midfield lai thawmtha turin Alexis MacAllister bakah Dominik Szoboszlai te an lalut fel tawh a, Southampton rawlthar thangduang tak Romeo Lavia an la ngaihven cheu.
Reds in midfielder hrawl tak tak chhawr tur an neih dawn avangin Henderson tan hmun chan tam a har dawn a, Liverpool tana club trophy chawi theih tur zawng zawng chawi kim tawh tu hian sum tam zawk hlawh tura Middle East lam a pan ve a hun ta em ni ang?
Merseyside club hian kumin nipui bazarah James Milner, Roberto Firmino, Alex Oxlade Chamberlain leh Naby Keita te an chhuah fel tawh a a, an captain Henderson la chan leh thei anni. English international hian Anfield ah kum hnih dang contract la nei mahse Al-Ettifaq zawm tura thutlukna a siam chuan inzahderna vangin a thlawn pawha an chhuahtir mai a rinawm.