Saudi Arabian club Al Ettifaq zawm tur Jordan Henderson chuan kum tam tak chhung a lo khawsak tawhna Liverpool a mangtha fel ta!
English international hian Anfield ah kum 12 chhung teh meuh khawsa in captain nihna hial a chelh a, game 492 lai a khel hman bawk. A captain-na hnuaiah Liverpool chuan trophy thahnem tak chawiin chung zingah UCL leh Premier League te pawh a tel nghe nghe.
Kum 33 a upa hian Liverpool kawr haa trophy a chawi theih tur zawng zawng a chawi kim hnuin sum tam zawk hlawh turin Saudi lam a pan dawn a, Reds captain manah hian Steven Gerrard club thar Al Ettifaq chuan £12 million an insêng ang.
Henderson hian Instagram lama Liverpool thlahna video a post a, a thu (caption) ah : “Tun kum 12 liamta chhung hi thu a han dahchhuah mai tur atan chuan a har hle a, chu aia harsa leh zawk chu he club mangtha hi a ni. Ka thih ni thleng in a sen ka ni reng tawh ang. Engkim avang khan ka lawm e. You’ll never walk alone” a ti.
Henderson bakah Liverpool midfielder dang Fabinho pawh tun nipui bazara Anfield chhuahsan tura ngaih niin Al Ittihad chuan Brazilian international hi Liverpool atangin £40 million vela lâkluh an tum mêk.
Henderson team thar tur Al Ettifaq hian season thara an league game hmasa berah Al Nassr an hmachhawn dawn a, Liverpool legend Henderson hian Man Utd legend Cristiano Ronaldo a hmachhawn nghal dawn ni pawhin a lang.