EFL Carabao Cup an chawi hnuin Manchester United defender Luke Shaw chuan manager Erik Ten Hag hnuaia an hlawhtlin bul intanna chauh anih thu a sawi.
Nizan EFL Carabao Cup final inkhelah Man Utd hian an khingpui Newcastle United chu sihnih faiin an hneh a, Casemiro an goal khat a khung bakah Sven Botman chuan an mahni lamah a tilut palh bawk.
Red Devils in 2017 hnuah a tumkhat nan trophy an chawi leh ta a, Carabao Cup vawi 6 an chawina a ni chiah bawk.
Carabao Cup chawi hlim Red Devils hi Premier League table ah 3-na anni mêk a, FA Cup leh Europa League lamah beisei tur an la nei bawk. English defender Luke Shaw chuan Carabao Cup hi an hlawhtlin bul intanna chauh anih ngei a ring.
Shaw chuan,” A ropui dangdai hle a, inkhelh tan hma khan he hmunah hian team thar leh manager thar hnuaia history siam tan kan duh thu kan sawi ho va, tun hi a bul tanna chauh a ni.”
“Nomawi hmanga bul tan kan duh a, heihi kan bul tanna dik tak chu a ni. Fans nena kan inkar pawh a tha tawh hle a, anni kan hmangaih ang chiah hian min hmangaih let ve in ka hria.”
Rashford pawhin Carabao Cup an chawi chungchanga a ngaihdan te sawi ve in,” Hetiang ang game kan khel thei hi a ropui hle a, tun hnai kuma he club thil hmaih fo a ni. Hun rei tak kan beih hnua hlawhtlinna kan chang thei hi a lawmawm takzet.”
“He hlawhtlinna hian thui zawk thleng tura min nawr kal ka beisei a, hetiang ang hun lawmawm tawn leh châk in kan tuihal tur a ni. Final ah chuan chak emaw chakloh tum a awm thin a, hnehna chang zawk kan nih hi chuan club tana thil ropui a ni. He club history a tel reng tawh tur a ni a, a dang pawh la tel belh zel kan duh.”