Lionel Messi chuan Major League Soccer club Inter Miami a zawm fel tawh a, United States lam tan chuan thil lawmawm tak a ni.
Ballon d’Or 7 kawltu hian Paris Saint Germain-a a contract a hman zawh hnuin Inter Miami lam pan turin thutlûkna a siam a, Saudi lam atanga sum tam tak an offer a hnâwl bakah a club hlui Barcelona lamah chhan hrang hrang vangin a kir leh lo bawk.
Argentine captain hian Inter Miami a zawm chungchangah a ngaihdan hetiang hian a sawi, “He hmuna ka awm thei hi ka lawm hle. Training te tan thuai ila, inel leh a châkawm tawh takzet. He hmunah hian inel tur leh hnehna chang turin ka rawn kal a, ka lo tih fo atangin ka team te hi ka tanpui leh dawn a ni. He hmunah pawh hian tumna ngai neia lo kal ka ni a, nuam kan titlang dawn hle.”
”United States a Inter Miami ah ka career ka chhunzawm thei tur hi a phurawm hle a, tun hi hun remchang tak niin kan thiltum tihlawhtling turin theihtawp in ka bei dawn a ni” a ti.
Messi bakah Sergio Busquets pawhin Miami a zawm fel tawh a, player pahnihte hi tun Zirtawpni a Leagues Cup match ah Cruz Azul lakah an club thar tana an game hmasa berah an khelh a rinawm.
Messi club thar Inter Miami hi Eastern Conference ah table mawngphah an luah mêk a, an game hnuhnung 11 ah te chakni hmel hmu tawh lovin tanpuitu ngaiin an rum mêk.