He club thil tum ber chu Champions League chawi a ni – Ederson

Manchester City goalkeeper Ederson Moraes chuan club thil tum ber chu UEFA Champions League trophy chawi anih thu a sawi a, chawi ngei tumin tun season ah pawh theihtawp an chhuah tur thu a sawi tel.

Tun hnai kum 10 chhunga Premier League club hlawhtling ber tia sawi ngam City hian an history ah UCL pakhat mah an la chawi lova, 2021 khan final hial thleng mahse league a an elpui Chelsea chu sikhat faiin an ngam lo.

Tun season ah Pep a nau te hi UCl chawi tura rinkai ber te zîngah an tel leh a, group G table leader niin knockout round an inhlangkai a, Round of 16 ah German club RB Leipzig nen an insu ang.

Man City siban vengtu Ederson Moraes chuan club in Champions League trophy a ngaih pawimawh zia hetiang hian a sawi, “Kan thil tum ber chu Champions League chawi a ni a, club thil tum lian ber pawh a ni. He nomawi hi chawi kan lo tum fo tawh a, kan tum zel bawk ang. 2021 ah final kan lut a, semifinal kan thleng ve leh zeuh thin bawk. Amaherawhchu kan duh ang result erawh tun thlengin kan la hlawhchhuak lo.”

“Tun season ah hian a hma zawng aiin final lut turin leh title chawi turin theihna kan nei. Tunah chuan he club mamawh ber a ni a, keini infiammi pawhin kan mamawh a, Pep Guardiola pawhin he hmuna chawi hi a mamawh a ni. Tunkumah theihtawp kan chhuah dawn a, chawi ngei kan tum ang” a ti.

City in tunkar Nilai zanlaia an hmachhawn tur RB Leipzig hi Erling Haaland an a ngam khawp mai a, game 4-a hmachhawn tawh atangin goal 6 lai a khung! Team pahnihte hian Red Bull Arena ah 1st leh match an khel ang.

error: Content is protected !!