Martin Odegaard chuan Arsenal captain anih avanga a inchhuan thu leh Emirates Stadium ah hun rei tak cham a inbeisei thu a sawichhuak.
Kum 24 a upa hian tun season ah Gunners tan league game 19 a inlan atangin goal 8 leh assist vawi 5 a thawkchhuak tawh a, a team chu table chung ber luahpui mek in captain nih a tlin vet vet hle.
“He club (Arsenal) captain ka nih avang hian ka inchhuang hle a, he hmunah hian hun rei tak cham ka inbeisei” tiin Odegaard chuan a sawichhuak.
Gunners hian tun season ah league game 20 an khelh atangin point 50 an hlawhchhuak tawh a, 2004 hnua a tum khat nan league title chawi leh turin dinhmun tha takah an ding mek.
Gunners hnuai chiah ah hian champion lai Manchester City an awm a, Pep leh a hote hian league game 21 an khelh atangin point 45 an hlawhchhuak tawh a, season hmasa lam an pha lo.
Odegaard chuan title race chungchang sawi leh in,” League title la thei tur zingah kan tel a, kawng thui tak la zawh tur erawh kan nei. Min ring rawh, team player te’n May thla kan la ngaituah kai lo hrim hrim. Game tina tan lak kan duh a, training session tina theihtawp chhuah a pawimawh. He team ring zo lo tute hnena ka sawi duh chu; ‘eng anga hlawhtlinna ropui pawh hlenchhuak thei tur kan ni’ tih hi” a ti.
Arsenal hian naktuk zan dar 8:30 ah Brentford an hmachhawn dawn a, hnehna an chang thei anih chuan City nen khelh zat in ang ah point 8 laiin hma an hruai fal tawh ang.