Bayern Munich leh Harry Kane te sawizawm an nih mêk karah Kane nupui Katie chu tunah hian Munich ah a awm mêk a, an chhungkaw chênna tur in thar a zawng nia report a ni.
German chanchinbu BILD chuan Katie hi tun hnaiah Munich a hmuh anih thu leh England captain nupui hian Grunwald vela in thar lei tur a zawn thu an tarlang a, he lai hmun vel hian Kane laina hnai thenkhat te pawh an khawsa ve nghe nghe. Tin, Kane nupui Katie hian an fate luhna tur school pawh Munich ah hian a hmu fel diam tawh nia sawi a ni.
Heng zawng zawng hi Munich lama insuan tum Kane leh a chhungte inbuatsaihna a ni a, kum 29 a upa striker hian transfer window inkhar hma ngei a club thar a neih a rinawm.
Tottenham lam chuan an striker chhuanvawr hi chelh beh tumin tan an khawh a, hlawh pawh thahnem tak pêk an inhuam. Amaherawhchu a player ber hian contract pawhsei a tum lova, trophy a chawi theihna tur hmun nia a hriat Bayern Munich lam pan a duh tawh.
Kane hian Bayern Munich chu mimal thilah inremna a neihpui tawh niin a lang a, Bayern hotu lu pakhat chuan English striker hi a thuthiamah a dingnghet anih chuan an lâkluh tur thu a lo sawi tawh bawk.
Bayern lam pawhin Kane hi an dawr mêk zel a, an bid theh luh vawihnih lai hnâwl ni tawh mahse a vawithum nan theh luh leh tumin an inbuatsaih mêk.