Manchester United legend Wayne Rooney chuan England captain Harry Kane chu Tottenham Hotspur ah lung in tâng ang mai anih thu a sawi.
Athletic in an kawmna ah England legend Rooney chuan Kane chu Tottenham ah lung in tâng ang mai anih thu a sawi a, Spurs tana goal khung tam ber hi Red Devils pan tura a player duh ber a ni.
Rooney chuan, “Ka tan chuan Harry Kane hi Man Utd zawm tura ka player duh ber a ni. Tottenham ah hian lung in tâng ang mai a ni a, tuna a awmna chhuahsan hi a tan a harsa hle. Man Utd in Harry Kane hi an neih theih hlauh chuan title an chawi theihna chance a sang sawt dawn a, thil a ti awlsam sawt bawk ang. Amaherawhchu chung chu engtik ah nge a thlen ang tih kan hre si lo.”
DC United boss chuan sawi chhunzawmin, “Season hmasa kha a chhuah hun tur tak a niin ka hria a mahse a la cham. Harry hian a chhuah a hun tawh tih leh club dang trophy a chawi theihna tur a awm tih pawh a hria ang. Tottenham tan chuan a tih theih zawng zawng a ti tawh a, tun thlengin a la awm bawk. Tun hi a chhuah hun tur tak a ni in ka hria a, chhuak tur hian a inpeih at tawh ngei ang. Mahse kan hriat ang in a tan Tottenham han chhuahsan mai hi thil awl ai lo tak a ni.”
Kum 29 a upa English striker hian Tottenham ah season khat bak contract a nei tawh lova, contract thar a ziah loh chuan kuminah Spurs lamin hralhchhuah an duh ngei in a rinawm.
Tun nipui bazarah Kane hi Europe-a club lian thenkhat nena sawizawm mêk niin tun dinhmunah Bayern Munich chu amah hnaih ber tu te anni.