UEFA Champions League Round of 16 second leg a Manchester City an ngam loh hnuin RB Leipzig head coach Marco Rose chuan Erling Haaland a fak hle a, an laka buaina thlentu ber anih thu a sawi.
Nizan zanlai khan Manchester City chuan an khelmual Etihad Stadium ah RB Leipzig an lo mikhual a, 7-0 zet in mual neitu lam hian mikhual lam hi lo sawp in Erling Haaland chuan goal nga lawih a khung bawk a ni.
Inkhelh banah Leipzig head coach Rose chuan hetiang hian City striker Haaland chungchang a sawichhuak, “Erling hi ka hrechiang em em a, a quality neih zawng zawng pawh ka hai lo. Goal hnaiha a awm anih chuan khung ngei a tum thin a, vawiin pawh khan goal nga a khung a, kan tan chuan ani lo dan kha a harsa lulai em a ni.”
”Game tha tak a chhawpchhuak a, a ke leh lu hmang te a goal a khung bakah second ball a la thei em em a, a tlan tam in game ah a inrawlh nasa hle. Engkim mai kha awlsam takin a lantir thei a, inkhelh banah match referee hnen atanga ball a la te khan player danglam bik anih zia a tilang” a ti.
Leipzig hian first leg ah City chu 1-1 in an inhnetawkpui a, beiseina nen Etihad Stadium ah second leg khel mahse an tum lo ang takin thil a thleng a ni ber. German club hian aggregate ah 8-1 zeta chaklo zawk niin UCL an mangtha.
Marco Rose chuan second leg a an game chungchang hetiang hian sawi leh in,” Kan goal chhuah dan zawng zawng te atang khan result duhawm lo tak kan nei dawn tih a chiang a, City khan chak an phu hliah hliah. A bikin penalty area a kan defending kha a chhe ngawih ngawih a, Champions League Round of 16 a tih atan chuan thil mawilo uchuak a ni. 1st leg a an nawr (press) dan nen a dang hret a, kha kha keini lam beisei loh thil tak a ni bawk” a ti.
