Haaland hian tun season ah goal 45 a khung ang – Owen Hargreaves

Owen Hargreaves chuan tun season ah Manchester City striker Erling Haaland chuan inelna hrang hrang atanga goal 45 a khung tling theih a beisei.

Nizan khan Manchester City chuan Champions League group stage a an match hmasa berah mual neitu Sevilla chu 4-0 ngawt in an sawp a, Phil Foden leh Ruben Dias te’n goal 1 ve ve an khung mai bakah Erling Haaland chuan goal 2 a khung bawk.

Tun season kal mekah Norway striker hian City tan game 7 a inlan atangin goal 12 a khung tawh a, Hargreaves chuan kum 22 a upa City striker hian hniam lam a pan mai a beisei lova, Premier League a Mohammed Salah record siam chu a thaichhiat ngei a ring. Liverpool forward Salah hian 2017-18 season khan league goal 32 a khung a, inelna hrang hrang atangin goal 38 a khung bawk a ni.

‘Haaland hian tun season ah goal engzah chiah nge a khung i rin?’ tia an zawhna Hargreaves chuan chhangin,”Ka ngaihdan chuan inelna hrang hrang atanga a goal khung belhkhawm hian Premier League ah record thar a siam ka ring a, goal 45 a khung ka ring e” a ti.

”Goal 41 a khung turah ka ngai” tiin Ferdinand an lo tuihnih a, Lescott pawh in ”goal 40 chunglam a khung ngei ang” a ti ve bawk.

City hian World Cup tan hma in kartin game 3 vel khelh tur an nei ziah dawn a, match an khel chho mawlh mawlh dawn. Squad an nei chhah bawk nen, inelna pali an khelh mek leh khelh tur Premier League, Champions League, FA Cup leh League Cup ah te hian thui tak an thlen vek theih a beiseiawm hle.

Related Posts

error: Content is protected !!