RB Leipzig director of sport Max Eberl chuan Josko Gvardiol chungchangah Manchester City lam nen an la inrem hnai loh thu a sawi.
Media tam tak leh journalist rintlâk tak tak te’n City leh Gvardiol an inhnaih tawh thu an tarlang a, City chuan kum 21 a upa defender hi £86 million a an lâkluh tur thu leh chu chuan Gvardiol chu khawvela defender man to ber a nihtir tur thu chena tarlan a ni.
Amaherawhchu RB Leipzig director of sport Max Eberl chuan Gvardiol transfer chungchang hetiang hian a sawi, “Manchester City nen eng inremna mah kan la nei lo. Kan nei hnai lo bawk. Thudik tak chu Man City in Gvardiol hi neih an duh a, mahse tunah chuan kan la inhlat rih hle. Szoboszlai transfer avangin sum lamah kan him rih a, chuvangin sum hi kan mamawh lo. Chu ai chuan Josko hi la cham se tih kan duh” a ti.
Gvardiol hi tun hnaia defender thangduang ber te zinga mi niin nikum FIFA World Cup ah khan a hming a chher hle bawk a, a ram Croatia chu pathumna a nihpui.
2020 khan Gvardiol hian RB Leipzig a zawm a, a team tan hian tun thlenga game 88 inlan tawhin a season zawnin German Cup a chawipui bawk.
Kum 21 a upa chauh la ni mahse Gvardiol hi Croatia tan game 21 a inlan dêr tawh a, City in an lalut thei anih chuan an defense a tiphui zual sawtin a rinawm.
Hetih mêk lai hian RB Leipzig lam chuan kuminah an player tha pahnih Christopher Nkunku leh Dominik Szoboszlai te chu Premier League club lian Chelsea leh Liverpool te lakah an chân tawh a, an defender pawimawh Josko Gvardiol hi chu la kawl chhunzawm zel an duh ngei ang. Chutihrualin a chhuah dawn rau rau chuan a manah £86 (€100) million an phut tur thu report chuan a tarlang.