Brighton atanga January transfer window liamta a Arsenal zawmtu Leandro Trossard chuan Brentford lakah a club thar tana a goal hmasa ber a khung a, a goal khung avanga a lawm viau rualin point 3 an hmuh loh vangin erawh a lawm a kim lo.
Nizan inkhelah Belgium international Trossard hian minute 66 na ah Arsenal hmahruaina goal a khung a, Ivan Toney hmangin Brentford in minute 74 na ah an siphurh an rul.
Inkhelh banah Trossard chuan a club thar tana a goal hmasa ber a khung avanga a lawm rualin point zawng zawng an hmu lo erawh in a tih lunghnur thu a sawi.
Kum 28 a upa chuan,” Goal ka khung avangin ka lawm hle a, hma lam pan zel turin min pui ang. Chutihrualin an siphurh sut na goal erawh kha chuan min ti lunghnur hle a, pawm thiam mai pawh a harsa viau. Kan che tha thawkhat hle a, Brentford laka goal khung hi thil awl ai tak a nilo” a ti.
Brighton forward hlui chuan sawi chhunzawmin,”Game khelh hma pawh khan kan sawi ho tawh a, kan khingpuite hi set piece a an that thu a ni. Vawiin ah pawh set piece atangin an khung rêng a, inzir nasat kan mamawh. Thil her danglam turin nilaini ah game dang kan hmachhawn dawn a, game zawng zawnga chet that hi thil theih a nilo. Nitin maia kan thawhrim a pawimawh a, team thawhhona leh phurna hi kan duh ang result kan hlawhchhuah ni ah pawh a awm reng a pawimawh.”
Gunners hian an game leh ah champion lai Manchester City an hmachhawn dawn a, inkhel pawimawh tak a ni dawn. City hian naktuk zanah Aston Villa an hmachhawn dawn a, hnehna an chang thei anih chuan Gunners nen point 3 in an inkar tihzim a ni ang.
