Gunners leh Spurs te’n Aymeric Laporte inchuh dawn?

Arsenal leh Tottenham Hotspur te chuan tun nipui bazara Etihad Stadium chhuahsan tura ngaih Manchester City defender Aymeric Laporte an inchuh dawn niin report chuan a tarlang.

Season hmasa a treble champion City in an level vawnnun zel an duh a, Ilkay Gundogan chân tawh mahse a thlâktu turin Chelsea leh Croatian midfielder Mateo Kovacic an lalut fel tawh.

Pep an City a zawm hnuin defense lam thawmtha turin sum an hmang nasa em em a, an sum insên nasat ang ngei in hlawhtlin pawh an hlawhtling rêng anih hi.

City in defender nei hrawl viau mahse Pep a la duhtawk mai lova, tun hnaia centre back beiseiawm ber pawl Josko Gvardiol a lalut dawn. Kum 21 a upa hian £85 million in Man City a zawm dawn tih Italian journalist Fabrizio Romano chuan a tarlang a, Croatian centre back hi football history a defender man to ber a ni ang.

Gvardiol an City a zawm dawn tâkah chuan Spanish centre back Aymeric Laporte chu City chhuahsan tura ngaih a ni a, kum 29 a upa defender hi Premier League club lian pahnih Tottenham Hotspur leh Arsenal te’n lâkluh an rilrûk mêk.

Laporte hian 2018 January thla khan £58 million in Man City a zawm a, European champion tan hian trophy 12 zet chawi tawh in chung zingah chuan Premier League title 5 leh UCL 1 a tel bawk.

Gvardiol an City a zawm chuan Laporte hi a chhuah ngei a rinawm a, City lam chuan an defender manah hian £25 million vel bak an phut lo nia sawi a ni bawk.

Season hmasa khan City chu ropui takin treble champion ni mahse Laporte erawh in mimal takin season a hmang tha lova, a team tan inelna hrang hrangah game 20 chauh inkhelh bul tanin centre back dang Manuel Akanji, Ruben Dias, Nathan Ake leh John Stones te aia inlan tlem a ni.

Chuvangin Laporte tan a inkhelh tam theih deuh tur hmun pan mai kha a finthlâk a, Premier League a City elpui Arsenal leh Spurs te chu atana duhthlan tur tha te annih a rinawm.

Laporte chuan hetiang hian Gunners manager Mikel Arteta a lo fak tawh nghe nghe,”Mikel hi coach ropui tak a ni a, Manchester a ka hmelhriat te ah mi tha ber te zinga mi a ni bawk. Engtik lai pawha player tanpui hi a inpeih a, player zawng zawng te nen hian an inkungkaihna a tha hle a, a bikin kei nen phei chuan a tha zual a ni” a ti.

Arsenal chuan nikum khan City atangin Gabriel Jesus leh Oleksandr Zinchenko te an lo lalut tawh a, an tifuh hle anih hi. Kuminah Laporte an lalut leh thei anih chuan an tifuh leh khawpin a rinawm.