Gunners in tunkar chhungin player thar dang an lâk fel hman a rinawm

Arsenal chuan tunkar chhung hian kumin nipui bazara an player thar palina ni turin Bitello an lâkluh hmel hman a rinawm.

Season hmasa league ah pahnihna ni a season an khar hnuin Gunners an tang em em a, season tharah chak zawk ah lo kir an tum ruh hle. North London club hian kumin nipui bazarah an squad thawmtha turin player pathum Declan Rice, Kai Havertz leh Jurrien Timber te lalut tawhin heng player thar pathum man belhkhawm chu £210 million lawih a ni!

Arsenal hian Rice chu West Ham atangin £105 million meuh in an lalut a, Premier League club player lâkluh to ber pahnihna niin British player man to ber a ni bawk. Tin, German international Kai Havertz leh Dutch defender Jurrien Timber te pawh an tlawm lo hle!

Gunners an la duhtawk mai dawn lo niin a lang a, player thar pathum lalut tawh mahse a palina pawh tunkar ral hmaa an tihfel hman a rinawm. Report tarlan danin North London club hian Brazilian rawlthar Bitello an lalut hnai a, kum 23 a upa manah hian Arsenal leh Gremio te chu £6.8 million in an inrem fel tawh bawk.

Bitello hian season hmasa khan club game 35 khel in goal 7 a khung a, European club thenkhat te’n ngaihven mêk mahse Premier League club Arsenal in an chang dawn niin a lang ta.

Hetih mêk lai hian Mikel Arteta nau te chuan naktuk hian pre season game pawimawh tak khelh tur an nei a, Sofi Stadium, California ah Spanish champion Barcelona an hmachhawn ang. Match hi zinglam dar 8 atanga khelh tan tur a ni.