Premier League hmahruaitu Arsenal leh Brentford te chu Emirates Stadium ah an insu a, 1-1 a inhnehtawkin point 1 ve ve an hlawhchhuak.
Gunners lam atangin substitution bench atanga dah luh Leandro Trossard chuan goal a khung a, a team thar tana a goal khung hmasak ber na a ni nghe nghe. Brentford lam atangin Ivan Toney chuan goal a khung ve bawk a, Player of the Match a thlan niin he match en ho chuan Arsenal tana Toney a ven a buaithlak zia in hre ngei ang.
Game pumpuiah Arsenal chuan 70 % lai mai ball an chang a, shot pawh vawi 23 (on target vawi 8) an nei bawk. An duh ber goal erawh vawikhat chiah an khung a, Brentford shot stopper David Raya a che tha hle bawk.
Thomas Frank leh a nau te hian team lian khelhpui an thiam hrim hrim a, tun season ah Premier League big six kan tih te atangin Man Utd, Man City leh Liverpool te an hneh tawh a, Arsenal, Spurs leh Chelsea te an inhnehtawk pui bawk.
Mikel Arteta leh a nau te’n point 3 hlawhchhuah theihna hun tha an bawhpelh a, amaherawhchu an hnuai chiaha awm City hi an game hnuhnung bera an tlawm avangin Arsenal in point 6 laiin hma an hruai fal ta tho a ni.
Season chawhnu lamah Gunners in beisei an pha lo tan a, an chak hleithei lo a ni ber. An game hnuhnung pathum ah vawihnih chaklo in vawikhat draw result an nei bawk a, Gunners fans te an mangang tan? Arsenal umtu City lam tan erawh zanin result kha result tha tak a ni ngei e.
North London club Arsenal hian an game leh ah champion lai Manchester City chu Emirates Stadium ah an lo mikhual dawn a, he match hian champion tur a hril thui viau âwm e. Arsenal in 2004 hnua league title chawi leh an duh takzet anih chuan City laka point hmuh a pawimawh ang.