Ilkay Gundogan chuan Manchester City chhuahsana Barcelona a zawm chhan a sawifiah.
German international hian Pep Guardiola hnuaia treble champion an nih hnuin Etihad Stadium a chhuahsan fel a, free agent in Camp Nou lam a pan. Kum 32 a upa hian Barca lam a pan chhan chu player naupang zawk te tanpui a duh vang niin a sawi a, rawlthar beiseiawm tak tak Gavi, Pedri, Ansu Fati leh midangte chu level sang zawka hlankai a rilrûk.
Gundogan chuan, “Ka tan chuan suangtuahna thleng dik ang mai hi a ni. Kum naupang tê ka nih lai atangin Barca inkhel hi ka lo en fo tawh a, Frank Rijkaard leh Pep Guardiola hnuaia Barca team te kha hmuhnawm ka ti thin hle. Chuan Barca hi ka ngaihven chho ta char char a, he Stadium ah ngei hian inkhel turin leh inkhel en turin ka lo kal ve ta zeuh zeuh bawk. Tunah erawh he club zinga mi ka ni ve thei ta reng mao hi ka inchhuang hle.”
”Football ropui tak kan chhawpchhuah ka beisei a, team ah hian theihna sang tak a awm bawk. Squad naupang tak kan nei a, ka tawnhriat tawh te hmang tangkaia player naupang zawk te’n level thar an kai theihnana tanpui theih ka inbeisei. Ka ngaihdan chuan bulthut tha tak a awm tawh a, theihna sang tak a awm bawk. Chu chu season tharah kan lantir a ngai a, chumi avanga he club rawn pan pawh hi ka ni. Tunah hian phurna leh inpêknaa khat ka ni” a ti.
Barca hian season hmasa khan league title an chawi a, pahnihnaa awm Real Madrid aiin point 10 laiin an sang nghe nghe. Kuminah Blaugrana hian squad an thawmtha leh zual a, season tharah trophy dang chawi leh ngei an tum dawn a ni.
Kum 32 a upa Ilkay Gundogan hian Germany leh England ah te top flight league title a chawi tawh a, Spain lamah Barcelona chu league title chawipui ngei a tum ang.
Xavi nau te hian pre season tour ah club lian thenkhat Juventus, Arsenal leh Tottenham ang te an hmachhawn dawn a, heng match ah hian Gundogan pawh a inlan ngeiin a rinawm.