Barcelona president Joan Laporta chuan Real Madrid player thar ni ta Arda Guler manah sum tam seng in lalut nise an tihsual tur thu a sawi.
Barcelona leh Fenerbahce te hian Guler transfer chungchangah inremna an nei fel hman a, Blaugrana hian kum 18 a upa midfielder manah a release clause €17.5 million pawh pek an inhuam.
Barcelona in Guler an lalut ngei dawn nia a lan laiin Barca elpui leh hmelma ni bawk Real Madrid an lo lang a, Los Blancos hian Barca lama aia sum sen hnem an inhuam zawk avangin Guler hi an chang ta niin a lang.
Josep Maria Bartomeu an Barca president hna a thawh lai khan Barca hi player lakluh nana uchuak taka sum hmang thin tia hriat lar anni a, he thil hi tuna Barca president Joan Laporta chuan nuai bo thuai a duh.
Laporta chuan eng vanga Guler lakluh tumna atanga inhnukdawk nge an nih tih hetiang hian a sawifiah, “Player nen inremna kan nei fel tawh a, Fenerbahce hnenah €17.5 million pektlak kan inpeih bawk. Mahse club dang an lo lang tan a, Real Madrid pawh telin keini aia sum sen tam an inhuam zawk bawk. Chuta chinah chuan a ngam huai huai chan (bidding war) ang kha kan tan mai dawn a, heng thila inhnamhnawih ve lo tur hian thutlukna kan siam ta zawk a ni.”
”Kan inhnuhdawh chhan chu kan inhuam chin a pelh tawh vang a ni. Kha aia la inhuam thui niin lo lalut pawh ni ila kan tisual zawk ang. Ani lo player tha dang bidding war a luh kher ngai lova lakluh tur an tam in kan hria. Guler lalut tur khan club dang kan el thei lutuk, mahse el lo turin thutlukna kan siam zawk. Kan inhuam chin tur kan bituk a, chu line kan siam chu pelh kan tum lo. Arda emaw player dang Barca zawm duh te lakah pawh kan inhuam chin hi ka pel ngai hauh lovang” a ti.
Barcelona hian kuminah an squad tichak zual turin free transfer in Ilkay Gundogan leh Inigo Martinez te an lalut tawh a, player lei nan sum tam tak insen tur an nei lo mahse player hrawl tak tak an chawlut thei zel a, hei hian club hlun leh ropui an nih zia a tilang chiang viau.