Mason Greenwood chu Dubai ah Manchester United-a a teammate Anthony Elanga nena training an neihlai hmuh a ni.
Greenwood training lai thlalak hi The Sun chuan an tarchhuak a, Man Utd lama a teammate Elanga bakah Udinese player James Abankwah pawh an zinga hmuh tel a ni.
2022 January thlaa pawngsual thubuai a awrh avangin Greenwood hi Man Utd chuan kumkhat leh a chanve chhung inkhel thei lo turin an hrem tawh a, kumina Man Utd pre season training na ah pawh tel ve phalsak a nilo.
Greenwood laka thubuai hi thuneitu sang lam te’n thlauhthla tawh mahse Man Utd erawh in an la chhuizui zel a, a hma hun tur chungchangah club hotute bakah hmeichhe team lam te’n thuneihna sang tak an nei.
Report tarlan danin Man Utd chuan Atalanta striker Rasmus Hojlund lakluh an duh avangin Greenwood hi Atalanta lamah loan a thawn phei an rilruk mek.
Kum 21 upa English international hian Man Utd tan game 129 a inlan atangin goal 35 a khung tawh a, Old Trafford ah season hnih dang contract a la nei. 2020 a England tana a game hmasa ber kheltu hi Man Utd lam chuan la hralhchhuah mai an iai deuh va, loan a chhuahtir chu an duh dan a ni.
Man Utd in zanin dar 8:30 ah kumina an pre season game hmasa ber an khel dawn a, Leeds United an hmachhawn ang. £60 million a Chelsea atanga an lakluh Mason Mount pawh Leeds United hmachhawn tur squad ah a tel a, zanin hian a club thar tana a game hmasa ber a khelh a rinawm.