Goalkeeper hlu zual top 5 – CIES

Khawvel a football team tha tak tak te’n goalkeeper tha tak tak an kawl a, team hlawhtlin nan goalkeeper te an tangkai hle a, outfiled player te aiin an pawimawhna a nep bik chuang awm love.

Football khelh dan phung a inthlak hret hret a, hmanlai deuh anga ball petchhuah tawp aiin a hnunglam atanga inpek chhoh an uar ta deuh deuh a, heng khelhdan style ah te hian goalkeeper ke hmang thiam te chu a pawimawh zual hle ani.

CIES football observatory chuan goalkeeper hlu zual panga an thlangchhuak a, chungte chu i lo thlir dawn teh ang:

5. Aaron Ramsdale (Arsenal) : Nikum nipui tranfer window a £30 million a Arsenal zawm tu hian Emirates stadium a a season khat hmanna atangin a that zia a pho lang nghal a, kum 24 a upa hian nikum season khan clean sheet vawi 12 neiin a team chu league table 5-na dinhmun a hauh pui. A man hi €51.2 million vel nia chhut ani.

4. Thibaut Courtois (Real Madrid): Chelsea atanga Real Madrid zawm tu kum 30 a upa hian nikum khan season tha tak a hmang a, league ah clean sheet vawi 16 neiin a team chu nomawi lian pahnih Laliga leh Champions League te a chawipui. A man hi €62.4 million hu vel nia chhut ani.

3. Ederson Moraes (Manchester City) : Kum 2017 a Etihad pan tu Ederson Moraes hi manager Pep Guardiola duhzawng tak niin a ke hman thiamna chu a larpui kan ti thei awm e. Kum 28 a upa Brazilian goalkeeper hian nikum khan league match 20 ah clean sheet neiin City in league nomawi an humhimna kawngah tha a thawh hlawk hle. A man hi €65.2 million vel nia chhut ani.

2. Allison Becker (Liverpool) – Kum 2018 a Liverpool zawmtu Allison Becker hi Premier League history a goalkeeper tha ber te zinga mi ani kan ti thei awm e. Nikum khan league match 20 ah clean sheet neiin a hnampuipa Ederson nen Premier League golden glove an dawn dun. Kum 29 a upa Allison hian nikum khan nomawi pahnih FA Cup leh Carabao Cup te chawiin league ah erawh pahnihna dinhmun an hauh thung. Tin, Champions League final match a tlawm zawk ah an tang bawk ani. A man hi €68.4 million vel a chhut ani.

1.Gianluigi Donnarumma (Paris Saint-Germain) – CIES football observatory in a goalkeeper hlu ber a a chhut hi kum 23 mi niin Italy leh PSG goalkeeper ani. He goalkeeper palian zet hian nikum khan PSG chu Ligue 1 nomawi a chawipui a, Euro 2020 final ah England hnehin a ram Italy chu Euro 2020 nomawi a chawipui bawk ani. A man hi €73.7 million hu vel a chhut ani bawk.

Related Posts

error: Content is protected !!