Paris Saint Germain in sithum faia an hmelma club Marseille an hneh hnuin manager Christopher Galtier chuan club legend Edinson Cavani record nihrualtu Kylian Mbappe a fak.
Nizan zanlai khan Ligue 1 table a 1-na PSG leh 2-na Marseille te chu league ah an inhmachhawn a, mikhual lam PSG hian Mbappe goal hnih leh Messi goal khat hmanga hnehna changin point 3 hlu tak an hlawhchhuak a, league ah point 8 laiin an sang fal ta.
Marseille laka goal hnih khungtu kum 24 a upa French forward Mbappe chuan PSG tana goal khung tam ber Uruguayan striker Edinson Cavani record nihrual chiah in Ligue 1 champion tan goal 200 a khung tling der tawh.
Inkhelh banah PSG head coach Christophe Galtier chuan hetiang hian France forward Mbappe a fak, “Mbappe te ang player tha hi chu stats leh records te’n an um zui a ni ber a, Cavani record ropui tak nihrual tawhin a khum ngei dawn tih pawh a chiang teh kel e. Team-a a tel hi a pawimawh thin em em a, a bikin goal hmaah a pawimawh zual hle” a ti.
Mbappe mai nilo Lionel Messi tan pawh zan chhinchhiahtlak a ni a, Ballon d’Or vawi 7 dawng tawh tu hian nizan khan a career ah club goal 700 a khung tling chiah a ni.
Hetih mek lai hian Marseille an hmachhawn tuma minute 16 na a hliam avanga lakchhuak Presnel Kimpembe hliam chu a nat thu leh tun season chhung a inkhelh theih tawh loh tur thu PSG head coach chuan inkhelh banah a sawi bawk.
Ligue 1 champion hian league game 25 atanga point 60 hmu tawh in table chung ber an luah chhunzawm zel a, an game leh ah Nantes an hmachhawn ang. Nantes an hmachhawn zawh hian German champion Bayern Munich an tlawh zui dawn a, Allianz Arena ah UEFA Champions League Round of 16 2nd leg an khel ang.