France leh Paris Saint-Germain (PSG) forward Mbappe chuan nizan khan career goal 300 a khung tling ve ta a, Lionel Messi leh Cristiano Ronaldo career goal khung zat khung tlin ve ngei a tum ruh hle.
Tunah hian Kylian Mbappe hi kum 24 a upa chauh ala ni a, a generation-a player tha ber pakhat anga sawi a ni a, hmalam hun eng tak ala nei mek.
France chuan Gibraltar hmachhawnin 14-0 lai maiin an hneh a, Kylian Mbappe pawhin hat-trick a siam nghe nghe. Goal 3 a khung belh hnuah career goal 300 a khung tling. First half-ah goal 1 khungin second half-ah goal 2 a khung belh a ni.
Amaherawhchu, PSG superstar Kylian Mbappe hian a thlen chin hi la duhtawk mai lovin, khawvel player tha ber pahnih C Ronaldo leh Leo Messi’an career goal an khung zat hi khung ve ngei a tum ruh hle a, club leh ram tan theihtawp chhuah a tul thu a sawi tel a ni.
“Player thenkhatte chuan an career-ah goal 800 atanga 850 an khung tling, career goal 300 ka nei thei hi a mak dangdai hle. Club leh ram tan hmasawn zel ka mamawh a, ka tum bawk a ni.” tiin Kylian Mbappe chuan TF1 a hrilh niin Fabrizio Romano’an a tarlang.
Kylian Mbappe hi kum 24 a upa chauh ala ni a, tunah hian career goal 300 lai a nei tling mek. Paris Saint-Germain tan goal 227 khungin, Monaco tan goal 27 a khung tel bawk a, a ram France tan goal 42 khung tling tawhin France under-19 tan goal 7 a khung tel bawk.
September thla tir khan Cristiano Ronaldo chu football history-a career goal 850 khung tling hmasa ber a ni a, Lionel Messi hian goal 821 a khung ve mek bawk.
Kylian Mbappe hi ala naupang a, C Ronaldo leh Messi hi a khum theih mai i ring em?