French legend David Trezeguet chuan an ram mipuite’n Lionel Messi an cheibawl dan a sawisel a, talent ropui tak nei player te an ngaihlu thiam lo chu pawi a ti hle.
Argentine captain Messi chuan 2021 nipui bazar lai khan free agent in Ligue 1 champion Paris Saint Germain a zawm a, French league ah hmasawnna tam tak thlenin a hma zawng aiin Ligue 1 in en a hlawh a, khawvel mipui tam tak hmaah Ballon d’Or 7 kawltu hian French league a phochhuak tha hle.
Amaherawchu Messi hian UCL la chawi lo PSG chu UCL title a hlawhchuahpui thei bik lova, season hnih a cham chhungin last 16 ah a team hlui hi a tlâkpui ve ve a ni.
An duh ber UCL title a hlawhchhuahpui theihloh avangin Messi lakah PSG fans te an lawm lo hle a, a inkhel lai vawi tam an boo khum! Messi chauh a nilo, Neymar Jr pawh in au el a tawk fova, fans thenkhat te phei chu a in kawtah pungkhawmin Neymar chu PSG chhuahsan thuai tura an duh zia an auchhuahpui hial!
French tana World Cup hial lo chawi tawh Trezeguet chuan France mipuite’n talent ropui nei footballer te ngaihlut nachang an hriat loh thu a sawi a, kumin nipui bazara Parc des Princes chhhuahsantu Lionel Messi a hum bawk.
Trezequet chuan, “France hian talent ngaihlut nachang an hre lova, chuvanga Messi kha hrethiam lo anni. Ligue 1 a rawn pan khan Championship enhlawh lutuk lo French league chu Premier League, Serie-A, Laliga leh Bundesliga te ai maha enhlawh na hun tha a rawn siam. Nimahsela France hian Messi talent an ngaihlu lova, a pawi hle. Messi hi football level hrang hranga nihna sang tak rawn chelhtu a ni a, league tana hamthatna leh hmingthanna nasa tak rawn thlen theitu a ni.”
”Ligue 1 hian player level sang tak an kawl tam lo. Kei, Henry, Dugarry leh Lizarazu te’n Messi kan hum avang hian sawiselna nasa tak kan tawk a ni. Talent ropui tak neitu leh football a thilmak thlentir tu lama tan hi kan thiamloh em ni?” a ti.
Messi hian Ligue 1 a season hnih a cham chhung khan UCL title chawi lo mahse league title pahnih a chawi a, PSG player thawhhlawk ber te zinga mi a ni. Kum 36 a upa hian a club hlui PSG tan khan game 74 a inlan hman a, goal 31 leh assist vawi 34 a thawkchhuak bawk.