France captain thar ni thei tur zingah Mbappe a tel – France head coach

Paris Saint Germain forward Kylian Mbappe chu France National Team captain thar ni thei tur zinga a tel thu France head coach Didier Deschamps chuan a sawichhuak.

France in FIFA World Cup 2022 final-a Argentina an hnehloh hnuin captain ni thin Hugo Lloris chuan international football a chawlhsan thu a puang zui a, Les Bleus tan Tottenham Hotspur goalkeeper a inlan tawh dawn loh avangin manager Didier Deschamps an captain thar a ruat a ngai dawn.

Kum 24 a upa Kylian Mbappe chu France captain thar ni tura rinkai a ni a, a ram tana a lo chet tawh dan zawng zawng te ah fans leh manager te mit a tlung hle.

”Captain ni tura han ngaihruat deuh te ka nei ve a, chung zingah chuan Kylian Mbappe pawh a tel chiang e. Keimaha thutlukna ka siam fel hma in player te nen pawh captain thar tur chungchang hi kan sawi ho phawt a tul dawn” tiin Didier Deschamps chuan a sawichhuak.

France head coach chuan sawi chhunzawmin,”Captain leh mawhphurhna hi thil inzawm tlat a ni a, chuvangin player dangte aia mawhphurhna pawimawh leh sang zawk nei anni. Mahnia thutlukna ka siam fel hma in team te’n sawi hona kan nei phawt ang” a ti.

Deschamps hian a squad thar berah Axel Disasi leh Matteo Guendouzi te a ko tel lova, chutihrualin Chelsea defender Wesley Fofana, Nice midfielder Khephren Thuram leh Lens goalkeeper Brice Samba te an telh thung.

France Squad: Alphonse Areola (West Ham), Mike Maignan (Milan), Brice Samba (Lens); Eduardo Camavinga (Real Madrid), Wesley Fofana (Chelsea), Theo Hernandez (Milan), Ibrahima Konate (Liverpool), Jules Kounde (Barcelona), Benjamin Pavard (Bayern Munich), William Saliba (Arsenal), Dayot Upamecano (Bayern Munich); Youssouf Fofana (Monaco), Adrien Rabiot (Juventus), Aurelien Tchouameni (Real Madrid), Khephren Thuram (Nice), Jordan Veretout (Marseille); Kingsley Coman (Bayern Munich), Moussa Diaby (Bayer Leverkusen), Olivier Giroud (Milan), Antoine Griezmann (Atletico Madrid), Randal Kolo Muani (Eintracht Frankfurt), Kylian Mbappe (Paris Saint-Germain), Marcus Thuram (Borussia Monchengladbach).

error: Content is protected !!