CIES football observatory chuan khawvel a forward hlu ber panga chhawpchhuakin an tha hlawm hle a, tin hma hun eng tak nei anni hlawm bawk. Kum 10 chuanga hming lang thin Cristiano Ronaldo leh Lionel Messi te’n upat lam an pan zel avangin forward hlu ber te zingah an hming hmuh tur a awm tawh lova, hun a danglam chak tawh hle ani.
Forward tha tak an awm nuk a, chung forward zinga a hlu zual 5 CIES football observatory in a a chhutchhuah te i lo en dawn teh ang, kan pawm zawk ani reng em? :
5.Luiz Diaz (Liverpool, €110 million) – Tun kum tir January khan Liverpool chuan Porto atangin €45 million in Luiz Diaz an lalut a, sesaon khatna atangin Klopp an a hmang thiam nghal hle. Kum 25 a upa Colombian forward hian nikum khan a club hlui Porto tan league game 18 a inlan atangin goal 14 leh assist vawi 5 a nei. Reds tan pawh rawn che tha chhunzawmin Premier League match 13 a inlan atangin goal 4 leh assist vawi 3 a nei hman.
4. Phil Foden (Manchester City, €124 million) – Pep Guardiola enkawl Man City squad ah player tha tak tak awm in chung zinga a hlu ber dawttu chu English rawhthar Phil Foden ani. England international hi kum 22 a upa niin nikum khan City tan inelna hrang hranga match 45 a inlan atangin goal 14 leh assist 11 a nei. A team chu league nomawi a chawipui bawk.
3.Erling Haaland (Manchester City, €152.6 million) – Tun nipui transfer a City zawmtu Erling Haaland hian pound 51 million in Etihad a pan. A club hlui Dortmund tan inelna hrang hrang a match 87 a inlan atangin goal 83 leh assist vawi 19 a nei. Kum 21 a upa Norway international hi Premier League ah eng takin che ang maw?
2. Vinicius Jr (Real Madrid, €185.3 million) – Footballer tha tak tak Brazil atangin an rawn chhuak tawh thin a, Vinicius Jr pawh hi chung zinga mi chu ani ngei mai. Kum 21 a upa hian season duhawm tak khar in a team Real Madrid chu Laliga leh Champions League nomawi a chawipui. Nikum khan Vinicius hian Madrid tan inelna hrang hrang a game 52 a inlan atangin goal 22 leh assist vawi 20 a nei.
1.Kylian Mbappe (Paris Saint-Germain, €205.6 million) – Kum 23 a upa Kylian Mbappe hi French forward niin CIES football observatory in khawvel a forward hlu ber ah a chhut. Nikum khan PSG tan inelna hrang hrang a game 46 a inlan atangin goal 39 leh assist 26 neiin football khawvel a hming lian pahnih leh a teammate ni bawk Neymar leh Messi te a khum. A team chu Ligue 1 nomawi chawipuiin Ligue 1 top scorer lawmman a dawng bawk.
