Tottenham Hotspur superstar Son Heung-min chuan tunhnai lawk khan football a chawlhsan hma chu nupui neih a tum lo niin a sawi a, a chhan a sawi tel bawk. Football-ah a rilru leh ngaihtuahna zawng zawng pek a duh thu a sawi chhuak.
Son Heung-min hi a hmain Hamburger SV leh Bayer Leverkusen tan alo khel ve tawh thin a, football khawvela winger tha ber pakhat anga sawi mek a ni. A career-ah club leh ram tan match 716 lai mai a khel tawh a, goal 267 a khung mai bakah assist vawi 120 a nei tling mek a ni.
Son hi ‘Asian David Beckham’ tia koh thin a ni bawk a, a chhan chu Son hian football atang mai ni lo pawn lam atang pawha sum a lak luh hnem vang niin an tarlang.
Son Heung-min hian nupui neih lam ala rilruk lo hle a, a chhan pakhat nia lang chu a pa thurawn a lak vang niin a lang. Son Heung-min pa hi footballer hlui a ni a, a career-ah player pawimawh tak pakhat alo ni ve tawh thin.
Tunhnai lawk khan Tottenham Hotspur Foundation chuan Women’s Day pualin all-girls disablity football session a buatsaih a, Son pawh tel ve in a kawppui tur chungchangah zawhna zawh a ni.
“Ka pa chuan thurawn min pe a, keipawhin ka pawm thlap. Nupui i neih chuan, number 1 ah i chhungkua, i nupui leh i fate ngaihtuah hmasak ber a ngai dawn a, chumi hnuah chauh football i ngaihtuah ang tiin. Top level-a football ka khelh lai hian football hi number 1-ah dah ka duh a, a chhan chu eng chen nge top football ka khelh dawn tih ka hre lo. Football chawlhsan hnu kum 33 emaw 34 hnu lamah pawh chhungkuain hunrei tak hlim leh lawm takin ala hman theih a ni.” tiin Son chuan a sawifiah.
Son Heung-min hi a hma khan Korean pop star Bang Min-ah leh Yoo So-young te nen thawm annei ve deuh a, mahse, tunah erawh engmah thawm a awm tawh lem lo.
