Kan hriat angin Manchester City star Phil Foden chu Real Madrid nen sawi zawm anni a, mahse, Foden hian Real Madrid hi a zawm duh kher ang em?
Tun season khelh mekah Phil Foden hi Man City tan a che tha hle a, hunrei tak khel theilo Kevin De Bruyn hmun a luah hneh hle. Inelna hrang hrangah match 40 a inlan atangin goal 18 a khung mai bakah assist vawi 10 lai a nei tling a ni.
Spanish outlet Defensa Central lamin an tarlan danin a chet that em avangin Spanish club lian Real Madrid chuan lak luh an duh niin a tarlang, tun summer transfer lo awm turah an lak luh theihna turin theihtawp an chhuah dawn niin an tarlang bawk.
Real Madrid chief scout Juni Calafat pawhin Phil Foden chu an next superstar tur atan Bernebeu lamah seng luh an tum thu a sawi chhuak nghe nghe.
Phile Foden hian Eitihad Stadium lamah kum 2027 thleng daih contract ala nei a, aman pawh a to lo theilo.
Phil Foden hi kum 4 a upa anih atangin Man City player alo ni tawh a, atan club chhuahsan mai pawh a harsa viau dawn niin a lang.
December thla khan a hmalam hun tur chungchang alo sawi tawh a, Manchester club hi chhuahsan mai ala tum loh thu a sawi.
“Tunah hi chuan City player ang chauhin ka la inhmu rih. Ka thawhrim chuan ka thil tih theih te ka hria. Team hi sang takah ka thlen pui thei a, chumi tur atan chuan khelh tam ka mamawh. Kumin hian khelhna hun ka nei tam hle a ni.” tiin Phil Foden chuan City media team te a hrilh.
“Ka thawkrim bawk a, manager in min rin avangin a chungah pawh lawmthu ka sawi” tiin a sawi belh bawk.
Foden hi City tan player pawimawh tak leh che tha tak pakhat a ni a, Real Madrid hi han pan ta se, first team tan regular taka khelh hi a harsa deuh mai thei. A chhan chu Rodrygo, Vinicius Jr leh Jude Bellingham te annei tawh a, heng ho nen hian an inel a ngai dawn a ni.
Hei mai bakah tun summer transfer lo awm turah Endrick chuan Real hi zawm a tum ve dawn a, Kylian Mbappe pawhin a zawm hnai niin an sawi bawk. Player tha hlang awmna Los Blancos pan chu a huphurhvawm viau dawn niin a lang a, a pan kher a rinawm lo.
